Украина разведка хизмати ходимлари, шунингдек, разведка бошлиғи Кирилл Будановнинг рафиқаси Марианна оғир металлар, жумладан, мишяк (маргимуш) ва симоб билан заҳарланган. Бу ҳақда Бош разведка бошқармаси ва Ташқи разведка хизматининг собиқ раҳбари Валерий Кондратюкка таяниб, НВ хабар берди.
“Менда ҳали ошкор этилмаган шундай махфий маълумотлар бор. Оғир металлар билан заҳарланиш юз берди. Таҳлил давомида мишяк ва симоб каби металлар топилган. Бу нафақат Кирилл Будановнинг рафиқасига, балки Бош разведка бошқармасининг бир нечта ходимларига ҳам алоқадор.
Гап Будановнинг рафиқаси билан бўлган соқчилар ҳақида кетмаяпти. Гап юқори мартабали амалдорлар — алоҳида ҳудудлар раҳбарлари ҳақида бормоқда, улар Россиядаги операция учун алоҳида масъулдирлар”, — деди Кондратюк.
Унинг сўзларига кўра, тергов заҳар жабрланувчиларнинг танасига қандай кириб келганини ҳозирча аниқлай олмаган. Марианна Буданова ва Украина разведка хизматининг бир неча ходимлари заҳарлангани 28 ноябрь куни маълум бўлди. “Украинска правда” нашри манбалари улар овқатдан заҳарланган бўлиши мумкинлигини тахмин қилмоқда.
Изоҳ (0)