Илон Маск Исроилга ташриф буюрганидан сўнг ҲАМАС расмийси Усама Ҳамдан америкалик миллиардерга Ғазога ҳам келишни таклиф қилди. Бу ҳақда Al Jazeera хабар берди.
Биз Илон Маскни халқимизга қарши қирғин ва жиноятлар кўламини кўриш учун Ғазо секторига ташриф буюришга таклиф қиламиз, — деди Ҳамдан.
Шунингдек, у Исроил фақат “куч тилини” тушунишини таъкидлади.
Агар исроиллик асирлар “қаршилик кучларининг” қўлига ўтмаганида, Исроил ўз қамоқхоналарида сақланаётган фаластинлик аёллар ва болаларни ҳеч қачон озод қилмаган бўларди. Озод қилинган фаластинлик маҳбусларнинг кўрсатмалари оккупантларнинг нақадар ваҳшийлигини исботлайди. Исроил қамоқхоналарида фаластинлик маҳбуслар бўлмаганида биз исроиллик асирларни ушлаб турмас эдик, — деди Ҳамдан.
ҲАМАС вакили араб етакчиларини “Исроил агрессияси ва Ғазо қамалини” тўхтатиш учун Ар-Риёддаги фавқулодда қўшма ислом-араб саммитида келишилган резолюцияларни амалга оширишга чақирди. Шунингдек, у секторнинг жануби ва шимолидаги асосий эҳтиёжлар кескин танқислигини бартараф этиш учун гуманитар ёрдам юк машиналари сонини кўпайтиришни сўради.
Эслатиб ўтамиз, Илон Маск 27 ноябрь, душанба куни Исроилга келган ва бош вазир Биньямин Нетаньяху билан биргаликда ҲАМАС ҳужумидан энг кўп жабр кўрган Ғазо сектори яқинидаги Кфар-Аза кибуцга ташриф буюрганди. Маск ва Нетаньяху Х’ ижтимоий тармоғида қўшма жонли эфир ўтказди. Миллардер Исроил бош вазирининг ҲАМАСни йўқ қилиш кераклиги ва Исроилда “бошқа танлов йўқ”лиги ҳақидаги фикрини маъқуллади.
Изоҳ (0)