Остонада яшовчи Наталя Свириденко (Меркулова) TikTok ижтимоий тармоғидаги эфир вақтида қозоқ миллати вакилларини очиқчасига ҳақорат қилгани ва уларни “бир-бирини ўлдиришга” чақиргани учун тўрт йилга озодликдан маҳрум этилди. Суд тегишли қарорни 23 ноябрь куни қабул қилган, деб хабар бермоқда KazTAG.
Аниқлик киритилишича, Свириденко Қозоғистон Жиноят кодексининг 174-моддаси 1-қисми (Ижтимоий, миллий, қабилавий, ирқий, синфий ёки диний адоватни қўзғатиш) бўйича айбдор деб топилган. Маҳкума жазони ўртача тартибли колонияда ўтайди.
Суд ҳужжатларида қайд этилганидек, воқеа 7 август куни юз берган. Остоналик аёл маст ҳолда TikTok’да ўзининг “Қиролича 2” аккаунти орқали трансляция қилган. Эфир вақтида ўз обуначилари орасида қозоқ миллатига мансуб шахслар борлигини билгач, аёл уларни қаттиқ ҳақорат қила бошлаган. Сўкинишлардан ташқари, Свириденко қозоқларни маймунларга тенглаштирган, фойдаланувчилардан бирини “касал” деб атаган, шунингдек, бутун республикани қамраб олган 2022 йил январдаги норозилик намойишларида этник қозоқларни айблаган.
“Шу тариқа Свириденко Н.В. телекоммуникация тармоқларидан фойдаланган ҳолда, миллий адоватни қўзғатишга, фуқароларнинг миллий шаъни ва қадр-қимматини камситишга қаратилган қасддан ҳаракатлар содир этган”, — дейилади суд ҳукмида.
Шунингдек, иш материалларида қайд этилишича, маҳкуманинг сўзларида талон-тарож қилиш ва жамоат тартибини бузиш, ўзгаларнинг мулкини ноқонуний тортиб олишга очиқ чақириқлар бор, унинг ҳаракатлари ижтимоий хавфли бўлиб, мамлакат халқи бирлигига қарши қаратилган.
Бундан ташқари, Свириденконинг сўзларини конституциявий тузумни бузиш чақириқлари сифатида қабул қилиш мумкинлиги ва унинг айрим фойдаланувчиларга нисбатан ҳақоратлари Қозоғистон ва Россия ўртасидаги дўстона муносабатларга путур етказиши мумкинлиги таъкидланган.
Изоҳ (0)