Сурхондарё вилоятининг Термиз шаҳри ҳокими Ўктам Тўраев ИИБ бошлиғига оғзаки топшириқ бериб, тадбиркорни 15 суткага қаматишга урингани тўғрисида хабар берилганди. Термиз шаҳар ҳокимлигининг мазкур ҳолатга муносабатида айтилишича, тадбиркорга нисбатан жарима чораси қўлланилган.
Қайд этилишича, мутасаддилар, кенг жамоатчилик фаоллари иштирокида Термиз шаҳри бўйлаб бунёдкорлик ишларининг бориши кўздан кечирилганда, чиқиндихоналардаги тўпланаётган чиқиндилар ўз вақтида олиб кетилмаётгани ҳақида аҳоли томонидан норозилик билдирилган.
Шу боис, ўрганиш жараёнидаги мазкур ишларга бевосита масъул ва жавобгар бўлган “Био техно эко” МЧЖ томонидан чиқиндихонадаги чиқиндиларни олиб кетиш ишлари ўз ҳолига ташлаб қўйилгани, ўзига юклатилган вазифаларни мунтазам равишда бажармасдан келаётгани ва шаҳарни ободонлаштириш қоидаларини бузгани сабабли ички ишлар органлари томонидан ҳуқуқий баҳо берилиши сўралган.
Термиз шаҳар ИИБ томонидан ҳолат батафсил ўрганилган ва ўрганишлар натижаларига кўра тўпланган ҳужжатлар асосида “Био техно эко” МЧЖ раҳбари Шуҳрат Шерназаровга нисбатан Маъмурий жавобгарлик тўғрисидаги кодекснинг 161-моддасига (шаҳарларни ва бошқа аҳоли пунктларини ободонлаштириш қоидаларини бузиш) асосан, БҲМнинг 1 баравари, яъни 330 минг сўм миқдорида жарима қўллаш бўйича баённома тузилган.
Ушбу ҳолат 26 ноябрь куни ҳам шаҳар ҳокимлиги ахборот хизмати томонидан холис баҳо бериш учун қайта ўрганилган.
Ижтимоий тармоқ фойдаланувчилари ҳамда кузатувчиларидан шаҳар ҳокимлиги тадбиркорларни доимо қўллаб-қувватлашга тайёр эканлигини маълум қилган ҳолда тасдиқланмаган ва асосланмаган маълумотларга ишонмасликни ва тарқатмасликни сўраймиз, — дейилади муносабатда.
Изоҳ (0)