Бугун, 25 ноябрь куни Тошкент шаҳрида Туркий давлатлар ташкилоти мусулмон диний идоралари раҳбарлари кенгашининг IV йиғилиши бўлиб ўтди. Бу ҳақда “Дарё” мухбири хабар берди.
Йиғилишда Туркий давлатлар ташкилоти бош котиби, Туркия, Озарбайжон, Ўзбекистон, Қозоғистон, Қирғизистон муфтийлари, уламолар ҳамда диний соҳа вакиллари иштирок этди. Анжуманда туркий дунёнинг диний идоралари ўртасидаги алоқаларини мустаҳкамлаш ва глобал муаммоларга биргаликда ечим топиш мавзуларида суҳбатлашилди.
Хусусан, Туркия диёнат ишлари бошқармаси раиси доктор Али Эрбаш йиғилишда нутқ сўзлаб, барча туркий халқларни дин ва қадриятларни асрашда бирдамликка чақирди.
Сўнгги вақтларда мусулмонларга турли таҳдидлар кучаймоқда. Дунёда терроризм авж оляпти. Исломофобияни шакллантириш учун ҳаракатлар бўляпти. Исломга қарши фикрлар фаол қўллаб-қувватланаётган бир пайтда биз мусулмон аҳли бирлашишимиз, таҳдидларга қарши биргаликда тура олишимиз керак. Динимиз ҳеч қачон терроризм ёки экстремизмга асос бўлмаган. Биз терроризимга қарши эканимиз жуда кўп таъкидланиши шарт бўлган масала.
Ислом дини билан терроризм ўртасида ҳеч қандай боғлиқлик йўқ. Ғарб томонидан исломни терроризмга боғламоқчи бўлмоқдалар. Улар сингдираётган бу тушунчалар ёлғон ва асоссиз. Империалистик кучлар исломга қарши душманларни шакллантирмоқда. Улар ўзларининг асосий душмани сифатида исломни кўришади. Биз туркий давлатлар ташкилоти аъзолари дунёда нималар бўлаётганидан хабардормиз. Ислом дини терроризмни манбаи ёки илдизи бўлмаган. Ислом ҳеч қачон терроризм томонда бўлмаган.
Иэрусалим, Сомали, Яман, Ғазо, Қуддус, Фаластин, Афғонистон каби жойларда геноцид жиноятлари юз бериб келмоқда. Бу инсоний қадриятларга зид, жуда ҳам катта жиноятлардир. Барча қадриятларни бузган ғарб энди “банкрот”. Улар ўз халқи олдидаги ишончни ҳам йўқотмоқда. Тавсия қилардикки, улар қотиллик, қирғинга қарши чиқаётган ўз аҳолисини тинглашсин.
Фаластинликларнинг мусулмон бўлгани учун бефарқ бўлаётганлар, Ғазо секторидаги бегуноҳ одамларни, чақалоқларни, аёлларни, қарияларни ўлдираётган Исроилни қўллаб-қувватлайдиганлар виждонида абадий шармандалик бор, —деди Али Эрбаш.
Тадбир давомида иштирокчилар томонидан экстремизм, ақидапарастлик ва мутаассиблик каби иллатларга қарши ҳамкорликда курашиш, исломофобияга муросасиз бўлиш масалалар муҳокама қилинди. Мазкур муаммоларни ҳал этишнинг ягона йўли бирдамлик, ўзаро алоқаларни мустаҳкамлаш экани барча муфтийлар томонидан таъкидланди.
Изоҳ (0)