Молдовалик бизнесмен ва сиёсатчи, “Бизнинг партия” партияси раиси Ренато Усатий Владимир Путинга мурожаат қилиб, ўзини Россия фуқароликдан маҳрум этишни сўради.
Сиз [Владимир Путин] менинг илтимосимга биноан хизматлар эвазига миннатдорчилик сифатида 2018 йил бошида Россия президентининг махфий қарори билан ота-онамга фуқаролик берган эдингиз. 2018 йилда содир бўлган ишлар учун раҳмат демоқчиман, лекин бугун менинг бошқа вариантим йўқ. Мен ва ота-онам ўз халқига қарши очиқ террорни бошлаган давлатнинг фуқароси бўлиб қолишни истамаймиз, — дейди Усатий.
Бир неча кун олдин Усатий 2024 йили Молдовада ўтказиладиган президентлик сайловларига ўз номзодини қўймоқчи эканини маълум қилганди.
Россияда Усатий 2020 йил июнда қидирувга берилган. Ўша йилнинг апрелида унга Россиядан пул маблағларини ноқонуний олиб чиқиб кетишда сиртдан айблов қўйилган. Терговчиларга кўра, Усатий аъзо бўлган жиноий гуруҳ BC Moldindconbank С.А. банки орқали Россиядан 500 миллиард рублдан ортиқ маблағни олиб чиқиб кетган.
Усатийнинг ўзи мазкур жиноий иш унинг сиёсий фаолияти билан боғлиқлиги, шу орқали уни парламент ёки президентлик сайловларида иштирокини таъқиқлашмоқчи экани ҳақида айтган.
Изоҳ (0)