Наманган вилояти Мактабгача ва мактаб таълими бошқармаси Чуст туманида боғча болаларини калтаклагани тасвирланган видеодаги тарбиячи юзасидан маълумот берди.
Ижтимоий тармоқда Чуст туманидаги 15-сонли давлат мактабгача таълим ташкилотига доир “Боғчада яна болалар калтакланди” номли видео тарқалди. Видео тасвирга кўра, боғча тарбиячиси тарбияланувчини ечинтириш чоғида қизчанинг юзига тарсаки туширгани, ижтимоий тармоқнинг бошқа бир каналида эса айнан шу тарбиячи тарбияланувчилар ўриндиғида ухлаб ётгани ва яна бир қатор салбий хатти-ҳаракатлари акс этган.
Мазкур ҳодиса вилоят Мактабгача ва мактаб таълими бошқармаси бошлиғи ҳамда бошқарманинг тегишли мутахассислари иштирокида тезкор ўрганув ташкил этилган.
Аниқланишича, мазкур ҳодиса ташкилот тарбиячиси Г.И. томонидан содир этилган ва бу хатти-ҳаракат 2022 йилнинг май ойида рўй берган. Тарбияланувчи Г. исмли қизалоқнинг калтакланиши билан боғлиқ ушбу ҳодиса номаълум сабабларга кўра, ҳозирга қадар очиқланмай қолган.
Шунингдек, ташкилот тарбиячиси Г.И. ўзининг салбий хатти-ҳаракатларини давом эттириб, 2022 йилнинг июнь ойида ташкилотнинг Х. исмли тарбияланувчисига нисбатан ҳам содир этган. 2022 йилнинг 17 июнь куни ушбу масала ташкилотнинг Кузатув кенгаши аъзолари иштирокида кўриб чиқилган ва Г.И. тарбиячи лавозимидан озод этилиб, “кирчи” вазифасига тайинланган.
Бундан ташқари, фуқаро Г.И.нинг жамиятда ўзини тутишига доир масала “Ёрқишлоқ” маҳалла фуқаролар йиғинида ҳам бир неча марта кўриб чиқилган.
Айни пайтда фуқаро Г.И. содир этган ҳодиса юзасидан тўпланган хулосавий материаллар ҳуқуқ-тартибот органларига ҳавола этиш ва у билан тузилган меҳнат шартномасини бекор қилиш чоралари кўрилмоқда.
Аввалроқ Хоразмдаги хусусий боғчада болаларга қўполлик қилган тарбиячи ишдан олингани тўғрисида хабар берилганди.
Изоҳ (0)