“Россияни жанг майдонида енгиб бўлмайди” — Дмитрий Песков

Россия президенти матбуот котиби Дмитрий Песков Украина, АҚШ ва бошқа давлатлар Россияни жанг майдонида мағлуб этиб бўлмаслигини тушуниши кераклигини айтди. 

“Киев ва Вашингтондагиларнинг барчаси тушуниши керак: Россияни жанг майдонида мағлуб этиб бўлмайди”, — деди Дмитрий Песков.

Russiaн Field тадқиқотига кўра, россияликларнинг аксарияти Россиянинг махсус ҳарбий операциядаги ғалабаси сифатида Украинанинг сўзсиз мағлуб бўлишини тушунади. Респондентларнинг тўртдан бир қисми ғалаба Россия учун янги ҳудудларни қўшиб олиш ва хавфсизликни таъминлаш бўлади, деб ҳисоблайди.

Сўров буюртмачиси, сиёсатшунос ва Жамоатчилик палатасининг аъзоси Александр Асафовнинг фикрича, ушбу “ғалаба қиёфасига” мос келиш учун эришилган натижалар ҳозирча етарли эмас, чунки қўлга киритилган янги объектлар жаҳон миқёсида тан олинмаган, шунингдек, душман тарафдан таҳдидлар ҳам ҳали бартараф этмаган.

ВТСИОМ раҳбари Валерий Федоровнинг фикрича, русларда ғалабанинг ягона қиёфаси йўқ. Сиёсатшунос Владимир Шемякин фикрича, бу ҳокимиятга Украинадаги ҳарбий амалиётлар натижаларини турлича талқин қилиш имкониятини беради.