АҚШ давлат котиби Энтони Блинкен Ғазонинг урушдан кейинги ривожланиши ҳақида ўйлаш зарурлигини, Исроил Ғазони қайта оккупация қилмаслиги кераклигини айтди. Бу ҳақда BBC хабар берди.
Блинкен Токиода бўлиб ўтган “Еттилик гуруҳи” (G7) давлатларининг етакчи дипломатлари йиғилиши якунида бу ҳақда фикр билдирган. Унинг сўзларига кўра, келажакдаги тинчликнинг асосий элементи “фаластинликларни Ғазодан мажбуран олиб чиқишни рад этиш” бўлиши керак.
“На ҳозир ва на урушдан кейин”, — деди у ва бошқа шартларга қуйидагиларни киритди:
- Ғазодан терроризм ёки зўравонлик ҳужумлари учун платформа сифатида фойдаланмаслик;
- Конфликт тугаганидан кейин Ғазони қайта оккупация қилишдан бош тортиш;
- Ғазони қамал қилиш ёки қамал қилишга уринишларидан воз кечиш;
- Ғазо ҳудудининг қисқаришига йўл қўймаслик;
- Ғарбий Соҳилдан ҳеч қандай террор таҳдиди чиқмаслигини таъминлаш.
Блинкен, шунингдек, “барқарор тинчлик”ка эришиш, жумладан, “фаластинликларнинг овози ва интилишларини Ғазодаги инқироздан кейинги бошқарув марказига” қўйиш қадамларини санаб ўтди.
“Режаларда Ғазони Ғарбий Соҳил билан Фаластин маъмурияти раҳбарлигида бирлаштиришни ҳам кўриб чиқиш керак”, — деди у.
Шу ҳафта бошида Фаластин президенти Маҳмуд Аббос Блинкен билан бўлган музокаралардан сўнг унинг маъмурияти маълум шартларга риоя қилган ҳолда Ғазо сектори учун масъулиятни ўз зиммасига олишга тайёрлигини айтди.
Блинкен, “бу Ғазони қайта қуриш учун барқарор механизм” ҳамда “исроиллик ва фаластинликларнинг икки алоҳида давлатда ёнма-ён яшашини таъминлаш йўлини” ўз ичига олиши кераклигини таъкидлади.
“Келажак ҳақида гапиришни бошлаш вақти келди, деб ҳисоблаймиз. Эртага эмас, урушдан кейин эмас, балки бугун”, — деди Блинкен.
Изоҳ (0)