Ўзбекистоннинг Екатеринбургдаги бош консуллиги ходимлари Ташқи меҳнат миграция агентлиги вакиллари билан ҳамкорликда Россиянинг Урал федерал округида мажбурий меҳнатга жалб этилган фуқароларнинг ватанга қайтишларига ёрдам берди, деб хабар бермоқда “Дунё” АА.
Бош консулликдан олинган маълумотларга кўра, 2023 йил октябрь ойида Ўзбекистон фуқаролари Х.С., Б.С. У.Д. Ташқи меҳнат миграция агентлигининг Екатеринбург шаҳридаги вакилига мурожаат қилиб Свердловск вилоятидаги “Рефтинская птицефабрика” корхонаси иш берувчилари бир гуруҳ ўзбекистонликнинг фуқаролик паспортларини олиб қўйганини ҳамда ойлик маошларини бермасдан мажбурий тарзда ишлатиб келаётганини маълум қилган.
Уларнинг мурожаатлари асосида олиб борилган суриштирувларга кўра, 2023 йилнинг сентябрь октябрь ойларида Москва вилоятида рўйхатдан ўтган “Константа” МЧЖ 100 нафардан ортиқ ўзбекистонликни Свердловск вилоятидаги йирик товуқ етиштириш хўжалигига олиб келган. Мигрантлар Россияда вақтинча бўлиш ва ишлаш ҳуқуқини берувчи ҳужжатлар билан расмийлаштирилмасдан ишга жалб этилган.
Ушбу фуқаролар билан мулоқот давомида улар 2 ой давомида ойлик маошларини олмагани, фуқаролик паспортлари тортиб олингани аниқланган.
Корхона раҳбарияти билан олиб борилган музокаралар натижасида 53 нафар ўзбекистонликнинг паспортларини олиб берилишига эришилди ва уларга ватанга етиб олишлари учун кўмак кўрсатилди. Қолганлар эса Екатеринбург, Москва ва бошқа шаҳарларда қонуний тарзда ўз фаолиятларини давом эттиришини билдирган.
Изоҳ (0)