Uzbekistan Airports Сергели туманида ёш споттерларнинг ҳуқуқ-тартибот органлари томонидан ушланиши юзасидан расмий баёнот берди.
Ижтимоий тармоқларда ёш споттерларнинг ҳуқуқ-тартибот идоралари ходимлари томонидан қўлга олингани ҳақидаги фото ва видео материаллар тарқалди. Таъкидланишича, воқеа Тошкент шаҳрининг Сергели туманидаги “Қумариқ” маҳалласи ҳудудида содир бўлган. Болалар ҳаво бандаргоҳи чегараларини бузмаган ҳолда Тошкент халқаро аэропорти панжараси ортида туриб самолётларни суратга олган.
“Газета.уз”нинг ёзишича, ходимлар болаларга бақириб, таҳдид қилиб, уларни сўккан. Болаларни “Қумариқ” маҳалла қўмитаси биносига олиб боришган ва барча суратга олиш жиҳозларини олиб кетишган. Ҳибсга олинган олти ўқувчи шахсий автомашинада бошқа жойга олиб кетилган.
“Uzbekistan Airports Ўзбекистондаги споттинг ҳаракатини қўллаб-қувватлайди ва ёш авлодни ушбу ҳобби билан шуғулланишига тўсқинлик қилмайди. Йил бошидан буён Тошкент аэропорти ҳудудида 30 га яқин режали ва режадан ташқари споттинг-турлар ташкил этилди. Шунингдек, жорий йилнинг 14 октябрь куни бўлиб ўтган режали кузги споттингда 6 ёшдан 15 ёшгача бўлган 12 нафар болалар қатнашганини ҳам алоҳида таъкидлаш лозим”, — дейилади хабарда.
2022 йил 26 январда Вазирлар Маҳкамасининг “Aвиспоттингни ривожлантириш учун шарт-шароитлар яратиш чора-тадбирлари тўғрисида”ги қарори билан Ўзбекистонда споттинг ҳаракати расман қонунийлаштирилган.
Изоҳ (0)