“Туркменэнерго” давлат корпорацияси Туркиянинг Çаlik Enerji Sanayi ве Ticaret А.Ş компанияси билан Туркманбошида 1574 МВт қувватга эга электр станциясини қуриш бўйича шартнома тузди, деб хабар бермоқда маҳаллий “Олтин Асир” телеканали.
“Президент Сердар Бердимуҳамедов “Маҳаллий электр энергияси экспорти ҳажмини ошириш тўғрисида”ги тегишли қарорни имзолаганди. Қурилиш ишлари 2023 йилнинг ноябрь ойида бошланиб, 2027 йилнинг май ойида станция фойдаланишга топширилиши режалаштирилган”, — дейилади хабарда.
Туркманистон Афғонистон, Эрон, Ўзбекистон ва Қирғизистонга электр энергияси сотади. Ашхобод Кавказ, Туркия ва Жанубий Осиёнинг янги бозорларига қизиқиш билдирмоқда.
Туркманистонда электр энергияси табиий газ ёрдамида ишлаб чиқарилади. Мамлакатда жами электр энергияси ишлаб чиқариш қуввати 2021 йилда 28,4 миллиард киловатт/соатни ташкил этган бўлса, режага кўра, 2028 йилда бу 37,5 миллиард киловатт/соатга етади.
Эзиз Бояров
Изоҳ (0)