Зўравонликка чақирувчи Telegram каналлари блокланади. Бу ҳақда Telegram ва “BKонтакте” ижтимоий тармоғи асосчиси Павел Дуров хабар берди.
“Зўравонликка чақирувчи каналлар Telegram, Google, Apple ва бутун цивилизациялашган дунё қоидаларини бузгани учун блокланади”, — дейди Дуров.
У мисол тариқасида “Доғистон тонги” Telegram канали блоклангани ҳақида маълумот берди. Каналда Республика аҳолисини тартибсизликлар чақирувчи пост жойланган.
Эслатиб ўтамиз, 29 октябрь куни Яқин Шарқдаги ҳарбий ҳаракатлардан норози оломон Тель-Авивдан самолёт етиб келганидан сўнг Махачқалъа аэропортининг учиш-қўниш йўлагига бостириб кирди.
Тўқнашувлар оқибатида 20 дан ортиқ киши жароҳатланган, ҳуқуқ-тартибот идоралари ходимлари оммавий тартибсизликлар моддаси бўйича жиноий иш қўзғатган. Доғистон Ички ишлар вазирлиги маълумотларига кўра, жароҳатланганлар орасида тўққиз нафар ҳуқуқ-тартибот ходимлари ҳам бор, улардан икки нафарига тиббий муассасада ёрдам кўрсатилмоқда.
Изоҳ (0)