Тайсон Фьюрининг промоутери Олександр Усикка қарши жанг санаси ўзгарганини маълум қилди.
Эслатиб ўтамиз, супер оғир вазн тоифасида WBA Супер, IBF, WBO ва IBO камарлари соҳиби Олександр Усик ва WBC чемпиони Тайсон Фьюри ўртасида мутлақ Жаҳон чемпионлиги учун жанг шартномаси имзоланган.
“Усикка қарши жанг бўлади, лекин 23 декабрда эмас. Ўша кунда жангни ўтказиш аҳмоқлик бўлади.
Фьюри 35 ёшда ва у эндигина 12 ҳафталик машғулотларни ва 10 раундлик жангни якунлади. У дам олиши, оиласи билан вақт ўтказиши лозим. Янги санани эса тайёр бўлган вақтимизда эълон қиламиз. Шартнома тузилган ва у ҳамон ўз кучида. Балки 2024 йилнинг январь ёки февраль ойида жанг бўлиб ўтар. Барчаси Тайсонга боғлиқ.
Тайсон декабрда жанг қилишга тайёрлигини айтганди, лекин мен уни ўз-ўзидан ҳимоя қилишим керак. Бу менинг ишим”, — дейди промоутер Фрэнк Уоррен.
28 октябрь куни Тайсон Фьюри ва Френсис Нганну Ар-Риёдда рингга кўтарилди. Якунда Фьюри ҳакамларнинг қарорига кўра (94-95, 96-93, 95-94) ғалаба қозонди.
Олександр Усик сўнгги жангини август ойида Даниэль Дюбуага қарши ўтказиб, 9-раундда техник нокаут эвазига ғалаба қозонганди.
Изоҳ (0)