Таиландда сайёҳлар орасида машҳурлик қозонган “сузувчи поезд” ишга туширилмоқда ва унинг учун чипталар сотуви бошланди. Бу ҳақида Таиланд Давлат темирйўллари ташкилоти маълум қилди.
Поезд Бангкок шаҳридан йўлга чиқади ва пойтахтдан 150 километр узоқликда жойлашган Лопбури вилоятидаги Пасак Жоласид тўғонигача боради. Ушбу йўналишдаги қатновлар ҳар йили қуруқ ва совуқ мавсумда йўлга қўйилади. Жорий йилдаги илк поезд 4 ноябрь куни йўлга чиқса, сўнгги поезд 28 январь куни йўловчиларни ўз манзилига элтади.
Поезд чиптаси нархи вагон синфи ва йўловчининг ортга қайтиш ёки қайтмаслигига боғлиқ. Энг арзон чипта нархи 150 бат (4 доллар) бўлса, энг қимматининг нархи 590 бат (16 доллар) гача боради.
Поездни “сузувчи” деб аташларига сабаб саёҳат вақтида йўловчи ўзини сув устидан юриб бораётгандек ҳис қилишидир. Сайёҳлар “сузувчи” поездда манзилга етиб олгач, Лопбури вилоятининг диққатга сазовор масканларини кўздан кечиришади.
Изоҳ (0)