Болливуднинг ёрқин олами катта экранда муваффақиятга эришган юлдузларнинг оддийгина ҳикоялари билан тўлиб-тошган. Аслида уларнинг ҳаётий ҳикоялари асосида ҳам ажойиб фильмлар-у сериаллар ишлаш мумкин. Қуйидаги ижодкорлар ҳаёти бунга яққол мисол бўла олади.
Ражникант
Ражникант кино оламига кириб келишдан аввал ўзини турли йўналишларда синаб кўрган. Аввалига дурадгор бўлиб ишлаган, кейин эса автобусларда чипта тарқатувчи сифатида тирикчилик қилган. Ўзининг ижодий фаолиятини бир неча песаларда кичик роллар ижро этишдан бошлаган Ражникант актёрлик маҳоратидан сабоқ олиш мақсадида Мадрасс кино институтига ўқишга кирган. Кинодаги илк ролини эса 1975 йилда “Нодир оҳанглар” картинасида ижро этган.
Сонакши Синха
Сонакши институтни тамомлагач, моделер сифатида фаолият юрита бошлаган. “Менинг қалбим бошқасига тегишли” (2006) лойиҳасида либослар бўйича рассом сифатида ишлаган бўлғуси юлдузнинг кино оламига актриса сифатида кириб келиши учун кўп вақт керак бўлмади. Боиси, Сонакши таниқли кино юлдузлари оиласида туғилган эди. 2010 йилда Салмон Хон қизга “Довюрак” фильмига суратга тушишни таклиф қилди, фильмдан сўнг Сона таниқли актриса айланди.
Акшай Кумар
Актёр кино оламининг таниқли юлдузига айланишидан аввал Бангкокка жанг санъатидан дарс бериш учун кўчиб ўтган. Бу ерда аралаш яккакурашни ўрганган, официант ва сомеле сифатида ишлаган. Ҳиндистонга қайтгандан кейин эса жанг санъати бўйича мураббий бўлиб ишга жойлашган. Шогирдларидан бири унга ўзини модел сифатида синаб кўришни таклиф қилгач, Акшайнинг ҳаёти тубдан ўзгариб кетди. Бўлғуси юлдуз модел сифатидаги илк шартномасини қўлга киритди, тез орада “Қасам” (1991) фильмидаги машҳур ролини ижро этди.
Паринити Чопра
17 ёшли Паринити Лондонга таҳсил олиш мақсадида келган вақтлари “Манчестер Юнайтед” фан-клубида озиқ-овқат бўлимига раҳбарлик қилган. Бу эса унга клуб ҳақида кўпроқ маълумот олишга имкон берди. 2009 йили бўлғуси актриса амакиваччаси Приянка Чопра билан бирга яшайдиган Мумбай шаҳрига қайтди. Паринити шаҳарга келгач, “Яш Раж Фильмс” компаниясига амалиётчи сифатида ишга жойлашди. 2011 йилда эса “Хонимлар Рики Бахлага қарши” фильмида дебют ролини ижро этди.
Навозуддин Сиддиқий
Навозуддин бакалавр дипломини қўлга киритгандан кейин кимёгар сифатида ишлаган, аммо тез орада кимё у хоҳлаган йўналиш эмаслигини англаб етган. Бўлғуси актёр Деҳли шаҳрида спектакл томоша қилганидан кейин ўзини кино оламида синаб кўриш қарорига келди. Миллий драма мактабига ўқишга киришдан аввал бир нечта саҳналарда кичик роллар ижро этди. Шу тариқа актёрнинг ижодий фаолияти бошланди ва 1999 йили “Ватанпарвар” фильмида иккинчи даражали ролни маҳорат билан ижро этиб, машҳурликка эришди.
Ранвир Сингх
АҚШнинг Индиана штатида таҳсил олган Ранвир Ҳиндистонга қайтиб, рекламаларда суратга туша бошлади. 2010 йилда “Яш Раж Фильмс” компанияси томонидан суратга олинган “Тўйлар муборак” фильмида таниқли актриса Анушка Шарма билан бирга ишлади. Ранвир бугунги кунда Болливуднинг энг таниқли актёрларидан бирига айланиб улгурган.
Ритеш Дешмукх
Ритеш архитектура коллежида меъморчилик йўналиши бўйича таҳсил олган, кейин эса бир йил мобайнида хорижий компанияда ўз мутахассислиги бўйича фаолият олиб борган. Унинг кино йўналишидаги фаолияти 2003 йилда “Сенга ваъда бераман” фильмидан кейин бошланди. Актёр ушбу фильмда бугунги кунда рафиқасига айланган актриса Женелия ДъСоуза билан бирга суратга тушган.
Боман Ирани
Болливуднинг энг таниқли актёрларидан бири Боман Ирани Мумбай коллежида таҳсил олиб, официантлар тайёрлаш бўйича икки йиллик дастур асосида ўқиган. Кейин эса бир неча йил мобайнида Тож-Маҳал меҳмонхонасида официант бўлиб ишлаган. Бўлғуси киноюлдуз ўзини фотожурналист сифатида синаб кўришга ҳам улгурган. Актёр кинодаги дебют ролини ижро этганида 41 ёшда бўлган.
Изоҳ (0)