Қашқадарёдаги Майданак астрономия обсерваторияси ўрнида сиҳатгоҳ қурилиши айтилди

Қашқадарёдаги Майданак астрономия обсерваторияси ўрнида сиҳатгоҳ қурилиши ҳақида хабарлар тарқалди. Ўзбекистон Фанлар академияси буни рад этди.

“Ўзбекистон 24” телеканали орқали эфирга узатилган лавҳада Қашқадарё вилоятининг мутасаддилари интервью бериб, унда Фанлар академияси Астрономия институтига қарашли Майданак астрономия обсерваторияси ҳақида “кўп йиллардан буён фаолият юритмаётган Майданак обсерваторияси ўрнида сиҳатгоҳ қурилади” дея фикр билдирилганди.

Ҳолат юзасидан муносабат билдирган Фанлар академияси матбуот хизматининг маълум қилишича, Майданак баланд тоғида иккита объект жойлашган. Биринчиси — Фанлар академияси Астрономия институтига қарашли Майданак астрономия обсерваторияси — республикадаги энг илғор илмий техник иншоотлардан бири ҳисобланади. Майданак обсерваторияси Фанлар академиясининг фахри бўлиб, бугунги кунда ўзининг ноёб астроиқлими билан жаҳоннинг энг етакчи бешта обсерваторияларидан бири ҳисобланади.

Қайд этилишича, бу жойда олиб борилаётган тадқиқотлар асосида ҳар йили дунёнинг энг нуфузли ва юқори импакт факторга эга бўлган илмий нашрларида 50 дан ортиқ мақолалар чоп этилади, шунингдек бир нечта диссертациялар ёқланади. Астрономия институти ва унга қарашли Майданак обсерваторияси 30 дан зиёд халқаро лойиҳаларда фаол иштирок этади. Қисқа қилиб айтганда, Майданак обсерваторияси бугунги кунда ўзининг 80 йиллик юбилейини нишонлаётган Ўзбекистон Республикаси Фанлар Академиясининг энг фаол ноёб объектлардан биридир.

“Бу ноёб объект президентимизнинг доимий назоратида бўлиб, Майданак обсерваториясини ривожлантириш ва унинг инфратузилмасини яхшилашга жиддий эътибор бериб келинмоқда. Сўнгги йилларда обсерваторияга олиб бориладиган йўлларни таъмирлаш ва оптик толали интернет тармоғини ўтказиш ишлари шулар жумласидандир”, — дейилади хабарда.

Иккинчиси эса, яқингача Ўзбекистон республикаси Мудофаа вазирлигига тегишли бўлган “Майданак” ўлчаш мажмуаси (Измерителний комплекс “Майданак”) бўлиб, ушбу объект ҳақиқатдан ҳам сўнгги йилларда фаолият олиб бормаган. Ушбу тепалик Майданак обсерваториясидан 4 километр шарқда жойлашган.

“Ҳозирда айнан шу жойда туристик зона қурилиши мўлжалланган”, — дея тушунтириш берди Фанлар академияси матбуот хизмати.

Шунингдек, мутасаддилардан бу икки объектни номларидан фойдаланишда аниқликка амал қилишларини сўради.

Қашқадарё вилоятининг Қамаши туманида “Майданак” туристик-рекреацион зонаси ташкил этилиши ҳақида 2022 йилнинг февралида маълум қилинганди. Соҳа мутахассислари денгиз сатҳидан 2650 метр юқорида бўлган “Майданак”  обсерваториясида бўлиб, Майданак тоғларининг 7900 гектар арчазор ҳудудларида ўтов, cампинг, глампинг, эко-уйлар, енгил конструкцияли контейнерлар жойлаштиришни муҳокама қилганди.