Исроил бош вазири Бенямин Нетаняху Ғазо секторига қуруқлик операциясини бошлашни кейинга қолдирмоқчи. Бу ҳақда манбаларга таяниб, Американинг Axios портали хабар берди.
Нашрнинг ёзишича, Нетаняху Исроил армиясининг режаларига шубҳа билан қарайди ва асирларни озод қилиш бўйича музокараларга кўпроқ вақт сарфлашга тайёр. Шу билан бирга, бу Исроил армиясини жанговар ҳаракатларга яхшироқ тайёрлаш имконини беради.
“Нетаняху Исроилнинг ҳарбий режаларига шубҳа билан қарайди ва унга кўпроқ вақт керак”, — дейилади хабарда.
Аввалроқ Исроил Ташқи ишлар вазирлиги жамоатчилик билан алоқалар бўйича директор ўринбосари Эммануэл Начшон Исроил армияси “ўлим тузоғига” тушиб қолишдан қўрқиб, Ғазо секторида кенг кўламли қуруқликдаги операцияни бошлашни кейинга сурганини айтганди.
Шунингдек, у Исроил қуролли кучлари кенг кўламли операцияни бошлашга шошилмаётгани, чунки аскарларни бунга тайёрлаш зарурлигини таъкидлаган.
Бироқ, Исроил мудофаа кучлари бош штаби бошлиғи Герци Ҳалеви ҳарбийлар қуруқликдаги операцияга тайёрлиги, уни бошлаш вақти мамлакат сиёсий раҳбариятининг қарорига боғлиқлигини айтганди.
Изоҳ (0)