Ўзбекистонда 65 нафар боланинг ўлимига сабабчи дея қаралаётган “Док-1 Макс” сиропи бўйича бўлиб ўтаётган суд мажлисида ўзбекистонлик амалдорлар ҳиндистонлик яна бир ишлаб чиқарувчининг 11 та дори воситасини қайта рўйхатдан ўтказиш учун 88 минг доллар талаб қилиб, олдиндан 50 минг доллар олгани маълум қилинганди. “Дори воситалари, тиббий буюмлар ва тиббий техника экспертизаси ва стандартлаштириш давлат маркази” ДУК раҳбари ўринбосари, судланувчи Н.М. пуллар олинганини рад этганди. Суднинг 23 октябрь кунги мажлисида сўроқ қилинган гувоҳ, судланувчи мансабдорнинг собиқ ёрдамчиси пул олди-бердиси бўлганини тасдиқлади.
2022 йилнинг декабрь ойи бошлари эди. Мен “фармакапия” қўмитасида ишлардим. Шунда мени Н.М. хонасига чақириб, телефон номер берди ва “шу киши билан учрашасан, нарса берворади, олиб келасан” деди. Ўша куни у киши билан кўришолмадим. Эртаси куни учинчи аэропорт “стоянка”сида учрашдим. Аёл киши эди. Қора целлофанда пул бериб юборди. Олиб келдим. Пул ўзингда туриб турсин, сўраганимда берасан деди, — дейди судда гувоҳлик берган собиқ ёрдамчи.
Гувоҳнинг таъкидлашича, у бир оз вақтдан сўнг яна ўша аёл билан учрашиб, дори намуналарини олган.
Бобур паркининг орқасида дори намуналарини олдим. Уч ёки тўртта қутини олиб келиб, давлат марказига бердим. Регистрациядаги болалар чиқиб, олиб кетишди. Орадан яна вақт ўтди ва ўша аёл билан кўришиб, банкка, адашмасам, 165 миллион сўм пул тўладик, — дейди гувоҳ.
Гувоҳнинг қўшимча қилишича, 50 минг доллар орадан бир оз вақт ўтгач, эгасига — ўша аёлга қайтариб берилган. Ва “Док-1 Макс” билан боғлиқ можаролар бошланиб қолгач, аёлга чет элга чиқиб кетиш ва тахминан 20 кун Ўзбекистонда бўлмаслик таклифи берилган. Унинг хорижга чиқиш ва қайтиш харажатлари мансабдор томонидан қопланиши ваъда қилинган. Бироқ аёл четга чиқиб кетолмаслигини айтиб, бу таклифни рад этган.
Аввалги судда пул берганини айтган гувоҳ сўралган 88 минг долларнинг 50 минг доллари мансабдорнинг ёрдамчиси орқали олинганини билдирганди. Қолган миқдори эса иш битганидан кейин олиниши ҳақида келишилганини, бироқ “Док-1 Макс” машмашалари бошланиб қолгани боис 11 та дорини рўйхатдан ўтказиш тўхтаб қолиб, ваъда бажарилмаганини ҳам айтганди.
Изоҳ (0)