Иқтисодиёт ва молия вазирлиги “Ижтимоий ҳимоя ягона реестри” ахборот тизими орқали кам таъминланган оилаларни аниқлаш ва уларга ижтимоий нафақалар тайинлаш бўйича электрон кўринишда ариза беришни жорий этишга оид ҳукумат қарори лойиҳасини муҳокамага қўйди.
Ҳужжат лойиҳасига кўра, 2024 йил 1 апрелдан бошлаб кам таъминланган оилаларга болалар нафақаси ва моддий ёрдам тайинлаш учун онлайн ариза бериш бўйича давлат хизмати йўлга қўйилади.
Бунда, Ўзбекистон президенти ҳузуридаги Ижтимоий ҳимоя миллий агентлиги Рақамли технологиялар вазирлиги билан биргаликда 2024 йил 1 апрелга қадар:
- “Ижтимоий ҳимоя ягона реестри” ахборот тизими орқали кам таъминланган оилаларни аниқлаш ва уларга ижтимоий нафақалар тайинлаш ҳамда маълумотнома тақдим этиш бўйича электрон кўринишда давлат хизматини кўрсатишни маъмурий регламентига мувофиқ Ягона интерактив давлат хизматлари портали (ЯИДХП) орқали жорий этилишини таъминлайди;
- давлат хизматини ЯИДХП орқали жорий этиш бўйича техник ҳужжатларни тасдиқласин ҳамда Адлия вазирлиги билан биргаликда тегишли ахборот тизимларининг ўзаро интеграция қилинишини таъминлайди;
- ЯИДХПда давлат хизматлари кўрсатилишининг ҳар бир босқичида мурожаатлар кўриб чиқилишини кузатиб бориш тартибини жорий этади.
Адлия вазирлиги ҳузуридаги Personaллаштириш агентлиги 2023 йил 15 ноябрга қадар Ўзбекистондан чиқиб кетган ва келган мамлакат фуқаролари, Ўзбекистон ҳудудида яшаш гувоҳномасига эга бўлган чет эл фуқаролари ёки фуқаролиги бўлмаган шахслар тўғрисидаги ҳамда уларнинг чет элга бориш мақсадлари тўғрисидаги электрон маълумотларни “Ижтимоий ҳимоя ягона реестри” ахборот тизимига “Электрон ҳукумат” тизими идоралараро интеграциялашув платформаси орқали тақдим этиб борилишини йўлга қўяди.
Давлат хизматларини кўрсатишдаги қулайликлар
Сўнгги йилларда давлат хизматларини кўрсатиш жараёнида 73 турдаги ҳужжат ва маълумотномаларнинг аҳолидан талаб қилиниши бекор қилинди. Шунингдек, 200 дан ортиқ тартиб-таомиллар соддалаштирилди.
Давлат хизматларини кўрсатишда талаб этиладиган ҳужжатлар сони 221 тадан 95 тага – 43 фоизга қисқартирилган. Биргина 73 турдаги ҳужжатларнинг қисқартирилиши натижасида йилига ўртача 20 миллион аҳолига қулайлик яратилди. Уларнинг 300 миллиард сўмдан ортиқ маблағи чўнтагида қолди.
Изоҳ (0)