Туркиядаги меҳмонхонада ишлаётган ўзбекистонлик фуқаро олти ойдан буён ёмон шароитда яшаётганидан шикоят қилиб, видео эълон қилди. Ташқи меҳнат миграцияси агентлиги мазкур хабар юзасидан маълумот берди.
Қайд этилишича, Анталя шаҳридаги Port Nature отелида ишлаётган фуқаро А.Ҳ. иш шароитларидан шикоят қилиб, Ўзбекистонга қайтиш учун муддатидан олдин авиачипта ва маошларини олиб беришни сўраб қилган мурожаати Ташқи меҳнат миграцияси агентлигининг Туркиядаги вакили томонидан ўрганиб чиқилди.
Маълум бўлишича, отел раҳбарияти А.Ҳ. хулқ-атворидан норози экани, бироқ ваколатхона илтимосини инобатга олиб, имкон қадар яқин муддатда уни Ўзбекистонга жўнатишини билдирган. Отел фаолияти жорий йил 15-20 ноябрга қадар давом этади, ходимларга авиачипта харид қилиш 10 ноябрдан, яъни иш мавсуми тугагач бошланади.
Шу билан бирга, аввалроқ А.Ҳ.га яшаш жойидаги камчиликлардан норозилиги сабаб шароити яхшироқ бошқа хонага ўтиш таклиф қилинган, аммо у ўз хонасида қолган. Ижтимоий тармоқларда тарқалган видеода акс этган ҳолат, яъни ювиниш жойидаги тартибсизликка унинг тозаликка риоя қилмаслиги, сантехника жиҳозларини авайламаслиги сабаб бўлган.
Бундан аввал ушбу фуқаро 2022 йилда агентлик орқали Измир шаҳридаги отелга ишга бориб, отел тартиби, шароити, отел раҳбарияти ва атрофидагиларга муносабати ҳамда ижтимоий тармоқлар орқали салбий маълумотлар тарқатиши оқибатида ишдан бўшатилган. Ваколатхона илтимосига кўра, Ўзбекистонга қайтиши учун унга отел томонидан авиачипта сотиб олинган эди.
Изоҳ (0)