“Док-1 Макс” бўйича бўлиб ўтаётган суднинг навбатдаги мажлисида Фармацевтика тармоғини ривожлантириш агентлиги собиқ раҳбарининг собиқ биринчи ўринбосари манфаатини ҳимоя қилаётган адвокат судланувчига суд тиббий экспертизаси тайинланишини сўради. Суд мазкур илтимосномани қаноатлантирди.
Адвокат М.Мадаминов ҳимояси остидаги Фармацевтика тармоғини ривожлантириш агентлиги собиқ раҳбарининг собиқ биринчи ўринбосари А.А.нинг соғлиғи судланувчининг яқинларини ташвишга солаётгани сабаб шундай илтимоснома билан чиқаётганини айтди.
Ҳимоямиз остидаги судланувчида 2015 йилда туғма суяк касаллиги аниқланган бўлиб, шундан буён у мутахассис кўригидан ўтиб, муолажа олиб келмоқда. Сўнгги марта 2022 йил 26 июлда унинг бош мия соҳасида жарроҳлик амалиёти ўтказилган. Касаллиги бўйича невролог, терапевт, ортопед ва нейрохирург назоратида туриши керак, — дейди судга бу ҳақда илтимоснома киритган адвокат.
Адвокатнинг билдиришича, судланувчида бир йилда бир марта бош мия суяги МСК ва МРТ текшируви ўтказилиши ҳамда унинг бир йилда икки марта даволаниши лозимлиги белгиланган.
Судланувчининг адвокати 2023 йил 25 август кунидаги суд мажлисида судланувчининг тоби қочиб, унга шошилинч тез тиббий ёрдам кўрсатилганини эслатиб, судланувчининг соғлиғида муаммолар борлигини, бу ҳолатда шифокорлар тайинланиб суд тиббиёт экспертизаси ўтказиш лозимлигини айтмоқда.
Судланувчи А.А.нинг соғлиғи унинг яқинларини жиддий хавотирга соляпти. Шу сабаб касаллик қандай этапда, шифокор назорати керакми, даволанмаса қандай натижаларга олиб келиши мумкин ва озодликдан маҳрум қилиш муассасаларида даволаш имкони борми, деган саволларга жавоб топилиши керак, — дейди адвокат.
Адвокат судланувчига нисбатан қўйилган ташхис — фиброз дисплазия касаллиги судланувчида мавжуд ёки мавжуд эмаслигига ҳам аниқлик киритиш керак демоқда.
Суд мазкур илтимосномани қаноатлантириб, судланувчининг соғлиғини назоратдан ўтказиш учун 19 октябрь куни имконият берилиши ва белгиланган тартибда шифокорлар ажратилишини билдирди.
Изоҳ (0)