Исроил ҳужумидан ҳалок бўлган фаластинликлар сони 2 минг кишидан ошди

Исроилнинг Ғазога берган зарбалари оқибатида ҳалок бўлганлар сони 2 215 нафарга етди, деб хабар бермоқда Фаластин Соғлиқни сақлаш вазирлиги.

Вазирлик маълумотларига кўра, 8 714 нафар фуқаро жароҳатланган. ССВ аниқлик киритишича, Ғарбий Соҳилда 54 фаластинлик ҳалок бўлган, 1 100 дан ортиқ одам яраланган.

Исроилда, сўнгги маълумотларга кўра, можаролар вақтида 1,3 минг киши ҳалок бўлган, 3,5 минг киши жароҳатланган. ҲАМАС ҳужуми қурбонларининг жасадларини излаш давом этмоқда.

Ғазо сектори Ички ишлар вазирлиги маълумотларига кўра, Исроилнинг фаластинлик қочқинлар карвонига берган зарбаси оқибатида 70 киши ҳалок бўлган, 200 дан ортиқ одам жароҳатланган.

Ғазо аҳолиси ичимлик суви танқислиги сабабли қишлоқ хўжалиги қудуқларидан шўр сув ичишга мажбур бўлмоқда, деб маълум қилди БМТ. Ҳудудда одамлар учун тоза сув таъминоти тўхтатилган.

Аввалроқ Исроил мудофаа кучлари Ғазо секторидаги тинч аҳоли жанубий ҳудудларга кўчиб кетиши учун яна олти соат вақт борлигини маълум қилганди.

АҚШ Эрон ва минтақавий гуруҳларни Фаластин—Исроил можаросига аралашишдан тўхтатиб туриш учун Яқин Шарққа ҳарбий самолётлар юборди, деб ёзмоқда Air Forcе Times Пентагондаги манбага таяниб.

Миср Ғазо сектори билан чегарадош ягона чегара пункти Рафаҳ дарвозасини қочоқлар учун ёпиб қўйди.