Суд ва терговларда мухолифатчи Алексей Навалнийнинг манфаатларини ҳимоя қилган адвокатлар экстремизмга алоқадорликда айбланиб, икки ой муддатга ҳибсга олинди, деб хабар беради “Коммерсант”.
Тергов қўмитаси Тергов бош бошқармасининг версиясига кўра, Алексей Липцер, Игор Сергунин ва Вадим Кобзев икки йил давомида Навалнийдан Россия ҳамда хориждаги ҳамфикрларининг ҳаракатлари тўғрисида маълумотларни, уларга бўлса, кўрсатмаларни етказиб турган. Россия Адвокатлар федерал палатаси ҳимоячиларга нисбатан жиноий таъқибнинг асослилиги текширилишини маълум қилди.
Алексей Навалний юзага келган вазиятни совет давридаги “қонуний вазият”га қиёслади.
Алексей Навалнийнинг адвокатлари тинтувдан ўтказилаётгани ҳақида 13 октябрь тонгида мухолифатчининг шериклари Вячеслав Гимади ва Иван Жданов маълум қилганди. Тергов ҳаракатлари Игор Сергунинг ва Алексей Липцернинг пойтахтдаги квартираларида ўтказилган, шундан кейин у Тергов бош бошқармаси биносига сўроқ учун олиб кетилган. Адвокат Вадим Кобзев эса Ковров туманида ушланган. Шу куни у Алексей Навалнийни иккита даъво бўйича судда ҳимоя қилиш керак эди.
Август бошида Москва шаҳар суди Владимирдаги қаттиқ тартибли колонияда ўтказилган йиғилишда сиёсатчи Алексей Навалнийни 19 йилга қамаганди. Мухолифатчи унга қамоқ муддати берилгач, “Сталин давридаги каби” нола қилмасликни тавсия қилганди. “Яхшиси, ўйлаб кўринг, нега бундай катта муддат бериляпти? Бунинг асосий мақсади — қўрқитиш. Мени эмас, сизларни”, — деган Навалний суд ҳукмидан олдин.
Изоҳ (0)