Айни пайтда расмий ташриф билан Чехияда бўлиб турган Ўзбекистон бош вазири Абдулла Арипов Страка академиясида Чехия бош вазири Петр Фиала билан учрашув ўтказди. Учрашув давомида Петр Фиала Чехия Ўзбекистоннинг уран ва мисига қизиқиш билдираётганини маълум қилган. Бу ҳақида Ceskatelevize сайти хабар берди.
IntelliNews маълумотларига кўра, ўтган йили Ўзбекистон уран қазиб олиш бўйича жаҳонда бешинчи ўринни эгаллади ва йил давомида 3300 тонна уран қазиб олди.
Шунингдек, томонлар Ўзбекистонга Чехияда ишлаб чиқарилган тоғ-кон ускуналарини экспорт қилиш, транспорт, таълим ва бошқа соҳалардаги ҳамкорликни ривожлантириш масалаларини муҳокама қилдилар.
“Бундан ташқари, чех компаниялари жорий йил бошида Ўзбекистон пойтахти Тошкентга уюштирилган ташриф чоғида Россия ва Совет Иттифоқидан қолган ҳарбий техника ўрнига Ўзбекистон қуролли кучлари учун муқобил техникалар таклиф этувчи ишончли ҳамкор бўлишга қизиқиш билдирган эди”, — дейилади хабарда.
“Баҳордан бери иккита L-410 самолётини етказиб бериш бўйича шартнома тузишга муваффақ бўлдик, “Ўзбекистон ҳаво йўллари” яқинда уларни қабул қилиб олди.
Бундан ташқари, Škoda Transportation Ўзбекистонга поездлар, трамвайлар ва метро тўпламларини етказиб бериш бўйича тендерда қатнашмоқда. Биз ушбу компаниянинг ҳудудлар бўйлаб ташувлар учун 34 та поездлар таркибини таклиф қилаётганини жуда қўллаб-қувватлаймиз”, — деди Петр Фиала.
“Агар Škoda Transportation тендерда ғолиб чиқса, бу Марказий Осиёнинг ушбу давлатида чех компаниясига берилган энг йирик шартнома бўлади”, — дейилади Ceskatelevize сайти хабарида.
Изоҳ (0)