Исроил жанговар самолётлари ўтган дам олиш кунлари Ғазо секторидаги 426 нишонга зарба берди. Бу ҳақда Исроил мудофаа кучлари матбуот котиби Даниэль Ҳагарий маълум қилди.
Унинг изоҳига кўра, ҳужумлар инфратузилмалар, жангчилар фойдаланаётган бинолар ва ерости туннелларига қаратилган. Келгусида Исроил томони ҳаво ҳужумларидан ташқари артиллерия зарбаларини ҳам амалга ошириши кутилмоқда.
Ҳагарининг таъкидлашича, якшанба куни ҳарбийлар Ғазо сектори яқинидаги Исроил аҳоли пунктларини "фаластинлик жангчилардан тозалашда давом этмоқда".
8-октябр тонгида хавфсизлик кучлари 29 та аҳоли пункти устидан назоратни тўлиқ қўлга киритган. Айниқса, Сдерот шаҳри, Кфар Аза, Зиким ва бошқа бир қатор аҳоли пунктларида "экстремистларни қидириш ва йўқ қилиш операциялари" давом этмоқда.
Якшанба куни ҳарбийлар Ғазо секторига туташ ҳудудларни фаластинлик жангчилардан тўлиқ тозалаши режалаштирилган.
Шу билан бирга, армия ҳозирда исроиллик ҳарбий хизматчилар бўлмаган аҳоли пунктлари қолмаганига ишонтирмоқда. Режага кўра, яқин соатларда Ғазо секторига яқин ҳудудлар аҳолиси эвакуация қилинади.
Можаро қачон ва қандай бошланди?
7-октябр куни эрталаб HАMAS кучлари Исроилга ҳужум бошлади. HАMAS аъзоларининг айтишича, “Ал-Ақса тўфони” операцияси давомида Исроил шаҳарларига беш мингта ракета учирилган, бир неча ўнлаб қуролли кучлар Исроилнинг Ғазо сектори билан чегарадош аҳоли пунктларига кириб борган. Исроил расмийлари мамлакатга икки мингдан ортиқ ракета келиб тушганини айтиб ўтган.
Изоҳ (0)