“Ҳозир Украина учун Россиянинг қишки ҳужумларидан олдин ‘ҳимоя қалқони’га эга бўлиш муҳим” — Зеленский

Украина президенти Владимир Зеленский ҳозир Украина учун Россиянинг куз ва қишда энергетика инфратузилмасига кутилаётган ҳужумларидан “ҳимоя қалқони” яратиш муҳимлигини таъкидлади. Бу ҳақда Зеленский Испаниянинг Гранада шаҳрида ОАВ вакиллари билан суҳбат чоғида маълум қилди.

Украина президенти Европа сиёсий ҳамжамиятининг саммитида иштирок этиш учун бу ерга келган. 

Унинг сўзларига кўра, ҳозир барча давлатлар учун асосий вазифа нафақат Европа Иттифоқи мамлакатлари, балки бутун Европада бирликни сақлашдир.

“Бу биз дуч келаётган энг катта синов. Чунки Россия дезинформация ва сохта хабарлар билан ҳужум қилмоқда”, — деди у.

Украина президенти тилга олган иккинчи муҳим масала — мамлакат учун Россиянинг қишки ҳужумларидан, жумладан Эронда ишлаб чиқарилган дронлардан “мудофаа қалқони”га эга бўлишдир.

Испаниядаги саммит давомида Украинанинг ҳаво мудофаасини кучайтириш масаласи кун тартибида бўлиши кутилмоқда.