“Тошшаҳартрансхизмат” автобус ҳайдовчиси уч ойдан буён ойлик маоши олмаётганини айтган аудиоёзувга муносабат билдирди.
Қайд этилишича, “Тошшаҳартрансхизмат” АЖнинг саккизта автобус саройи филиалларида хизмат кўрсатувчи автобус ҳайдовчиларининг ойлик маошлари қуйидаги тартибда ҳисобланади:
- ишланган ой тугагач кейинги ойнинг 1-санасидан 10-санасига қадар ҳайдовчиларнинг бир ойда ишлаган иш соати, бажарган қатновлар сони, мунтазамлиги ҳисоблаб текширилади.
Кейин эса ҳайдовчининг бир ой давомида йўналишда ҳаракатланган вақтда содир этган қоидабузарликлари текширилади. Барча маълумотлар йиғилгандан сўнг, кейинги ойнинг 10-санасидан ойлик маошининг аниқ ҳисоби чиқарилади. Шундан сўнг, белгиланган ойлик маошлари ҳайдовчиларга тўлана бошлайди.
Мурожаатда келтирилган маълумот, яъни автобус ҳайдовчиси уч ойдан буён ойлик маоши олмаётгани ҳақидаги маълумот ёлғон ҳисобланиб, айни пайтда “Тошшаҳартрансхизмат”нинг 8 та автобус саройи филиаллари ҳайдовчиларининг фақатгина август ойи учун қисман қарздорликлари мавжуд, — дейилади муносабатда.
Жумладан, август ойида жами 30 миллиард сўм пул маблағи ҳайдовчиларнинг ойлик маошлари учун тўланиши белгиланган бўлиб, шундан ҳозирда 18 миллиард сўми тўланган. Қолган 12 миллиард сўм ойлик маоши бўйича қарздорлик ҳафта якунига қадар тўлиқ қопланиши белгиланган.
Ўзбекистонда жамоат транспорти
Президент Шавкат Мирзиёев ўзининг Олий Мажлис ва Ўзбекистон халқига йўллаган мурожаатномасида жамоат транспорти мутлақо ўзгариши ҳақида айтган эди. Шундан сўнг апрель ойида Тошкентга Хитойдан 268 та автобус ва электробуслар олиб келинди.
Май ойида Бухорога янги 100 та автобус ва микроавтобус, июль бошида Сирдарё вилоятига эса 160 та янги автобус олиб келиниши маълум бўлди. Аввалроқ “Тошшаҳартрансхизмат”га йўловчиларни ташишда кўриладиган зарарларни қоплаш учун 18 миллиард сўм ажратилгани, Тошкентдаги 32 та автобус йўналишида “кунлик план” бекор қилингани ҳақида хабар берилган эди.
Изоҳ (0)