Ўзбекистонда 65 нафар боланинг ўлимига сабабчи дея қаралаётган “Док-1 Макс” сиропи бўйича бошланган суд мажлисининг 4-октябр куни давом этган навбатдаги мажлисида ҳиндистонлик судланувчининг адвокати яна ҳимояси остидаги судланувчига нисбатан қўлланган қамоққа олиш тарзидаги эҳтиёт чорасини ўзгартиришни сўраб илтимоснома киритди. Бу ҳақда суд мажлисида иштирок этаётган “Дарё” мухбири хабар берди. 

Адвокат Даврон Аҳмадов судда сўз олар экан судланувчи С.Р.П. (Quramax Medical МЧЖ директори)нинг вегетарианлигини, шу сабаб Ўзбекистон қамоқхонасида овқатлана олмаётганини, бу эса унинг соғлиғида муаммолар туғилишига сабаб бўлаётганини айтиб, унга нисбатан қўлланган қамоқ эҳтиёт чорасини бекор қилишни сўради.

Суд ҳайъати мазкур илтимосномани яна барвақт киритилган илтимоснома деб баҳолади ва қаноатлантиришни рад этди.

Эслатиб ўтамиз, “Док-1 Макс” судининг дастлабки мажлисида ҳам адвокат Даврон Аҳмадов суд ҳайъатидан ҳимояси остидаги айбланувчининг дини, вегетарианлигини инобатга олиб, унга нисбатан қўлланилган қамоқ эҳтиёт чорасини бекор қилишни, айбланувчига қамоққа олиш билан боғлиқ бўлмаган эҳтиёт чораси қўлланилишини сўраганди. Суд ўшанда ҳам мазкур илтимосномани барвақт киритилган илтимоснома деб баҳолаб, рад этганди.