АҚШ Эрондан мусодара қилган минглаб қурол ва ўқ-дориларни Украинага топширади. Бу ҳақда CNN Америка ҳукуматидаги манбаларига таяниб хабар берди.

Унга кўра, АҚШ Марказий қўмондонлиги бундай қарор ҳақида шу ҳафта охиригача эълон қилади.

Аввалроқ АҚШ давлат котиби Энтони Блинкен Украина ҳукумати ва ҳарбийлари Киевга иттифоқчилар томонидан етказиб берилган қуролларни қаерда ва қандай шароитда қўллашни мустақил ҳал қилишини айтиб ўтганди.

“Таъкидлаш жоизки, етказиб берилган ҳарбий техникадан қандай фойдаланиш, уларни қаерда қўллаш ҳақидаги қарорлар фақат украиналиклар томонидан қабул қилинади. Улар ўз ватанларини қандай ҳимоя қилишни, ўз ерларини қандай қилиб энг яхши тарзда қайтариб олишни ҳал қилишлари керак. Биз буни фақат уларнинг ихтиёрига қолдирамиз, бу ҳолатда вазиятга таъсир қилишимиз фақат маслаҳат кўринишида бўлиши мумкин”, — деганди Энтони Блинкен.

Шу билан бирга, Блинкен Қўшма Штатлар Украина қуролли кучларининг Россия ҳудудига бераётган зарбаларини “рағбатлантирмоқчи эмас” ва бундай ҳужумларни қўллаб-қувватламаслигини таъкидлади. Бироқ, унинг сўзларига кўра, бу ҳужумларни амалга ошириш бўйича якуний қарор ҳар қандай ҳолатда ҳам Киевда қолади, у бу ҳужумлар қанчалик зарурлигини ҳал қилиши керак.