Сурхондарё вилояти божхона бошқармаси ходимлари “Болдир” темир йўл чегара божхона постига қўшни давлатдан ноқонуний кириб келган қиймати 15 миллиард сўм бўлган салкам бир миллион қути ноқонуний сигареталарни тўхтатиб қолди. Бу ҳақда “Дарё”га бошқарма ахборот хизмати раҳбари Шоҳруз Ўролов хабар берди. 

Айтилишича, бу ҳолат темир йўл поезди таркибидаги вагонлардан бири белгиланган тартибда божхона назоратидан ўтказилган пайтда фош бўлган. 

Натижада ушбу вагонда юк кузатув ҳужжатларида кўрсатилмаган, акциз маркалари мавжуд бўлмаган ва божхона назоратидан яширилган умумий қиймати 15 миллиард сўмлик 999 956 қути Milano номли сигарета маҳсулотлари борлиги аниқланди. Ҳозирда мазкур ҳолат юзасидан божхона органлари томонидан текширув ҳаракатлари олиб борилмоқда, — дейди масъул.

Қўшимча қилинишича, ўтган ойда ҳам айнан шу божхона пости орқали олиб ўтилаётган 12,7 миллиард сўмлик 851 минг қути ноқонуний тамаки маҳсулоти тўхтатиб қолинган.