Озарбайжоннинг ҳарбий амалиёти ва тан олинмаган республика аҳолисининг оммавий кўчиб кетишидан сўнг Қорабоғда 50 дан 1000 гача этник арманлар қолди. Бу ҳақда ҳудудга ташриф буюрган БМТ миссияси маълум қилди.
БМТнинг Озарбайжондаги доимий координатори Владанка Андреева бошчилигидаги миссия 30 йил ичида биринчи марта Қорабоғга келди. БМТ ходимлари Агдамдан Ханкендига (Степанакерт) ташриф буюрди.
“Миссия ташриф буюрган шаҳар қисмларида фуқаролик жамоат инфратузилмаси, жумладан, шифохоналар, мактаблар ва турар-жой бинолари, маданий ва диний обидаларга ҳеч қандай зарар етказилмаган”, — дейилади ҳисоботда.
Шу билан бирга, миссия “маҳаллий аҳолининг уйларини қанчалик тез тарк этгани ва улар бошдан кечирган азоб-уқубатлардан” ҳайратда эканини билдирди.
19-сентябр куни Озарбайжон ҳукумати Қорабоғда “конституциявий тузумни тиклаш бўйича аксилтеррор чоралари”ни эълон қилди ва ўзини ўзи эълон қилган республика ҳудудини ўққа тута бошлади. Эртаси куни ўт очишни тўхтатиш тўғрисида келишиб олинди ва 28-сентябр куни тан олинмаган Тоғли Қорабоғ республикаси президенти Самвел Шаҳраманян фармонга имзо чекди, унга кўра “республика” 2024 йил 1 январдан ўз фаолиятини тўхтатади.
3-октябр куни Никол Пашиняннинг матбуот котиби Назели Багдасарян Қорабоғдан Арманистонга 100 625 этник арман кўчиб келганини маълум қилди. Конфликт бошланишидан олдин “республика” аҳолиси 120 минг кишига баҳоланган.
Изоҳ (0)