Президент матбуот котиби Шерзод Асадов хорижий ташрифлардан асосий мақсадлар нималар экани ҳақида маълумот берди.
Шерзод Асадовнинг таъкидлашича, ўтган бир ой Шавкат Мирзиёев фаолияти ташқи сиёсий тадбирларга ниҳоятда бой бўлди. Хорижий ташрифлардан асосий мақсадлардан бири Ўзбекистонда иш ўринларини кўпайтириш экани қайд этилган.
“Охирги бир ойда президентимиз Шавкат Мирзиёев фаолияти ташқи сиёсий тадбирларга ниҳоятда бой бўлмоқда. Интенсив ва самарали хорижий ташрифларнинг гувоҳи бўляпмиз. Маълумки ташқи сиёсат бу — мамлакатнинг ички сиёсатидан, эҳтиёжларидан келиб чиқади. Ушбу ташриф ва халқаро мулоқотлардан асосий мақсадлар, авваламбор, мамлакат иқтисодиётини ривожлантириш, ички имкониятларини максимал ишга солиш билан бирга хорижий инвестицияларни жалб қилиб Ўзбекистонда иш ўринларини кўпайтириш. Умуман аҳоли фаровонлигини ошириш ва бу орқали инсон қадрини улуғлаш”, — дейди Шерзод Асадов.
Хорижий ташрифлар:
Шавкат Мирзиёев Тожикистон президенти Эмомали Раҳмоннинг таклифига биноан 14 сентябрь куни амалий ташриф билан ушбу мамлакатга борган.
17-сентябр куни эса БМТ Бош Ассамблеясининг 78-сессияси тадбирларида иштирок этиш учун амалий ташриф билан АҚШга етиб борган.
Шунингдек, Германия Федерал канцлери Олаф Шольцнинг таклифига биноан 28-сентябр куни амалий ташриф билан Берлин шаҳрига ташриф буюрган.
1-октябрда Қатар давлати амири шайх Тамим ибн Ҳамад Ол Сонийнинг таклифига биноан давлат ташрифи билан Доҳа шаҳрига борган.