Андижон вилоятида ноқонуний электр энергиясидан фойдаланиш орқали давлат манфаатларига 1,5 миллиард сўмдан ортиқ зарар етказилгани маълум бўлди, деб хабар беради Энергетика вазирлиги матбуот хизмати.
Қайд этилишича, “Ўзэнергоинспекция” томонидан ҳуқуқни муҳофаза қилувчи органлар ва электр таъминоти корхоналари мутахассислари билан ҳамкорликда Андижон вилоятида ўтказилган назорат тадбирларида электр энергиясидан ноқонуний фойдаланиш ҳолатлари аниқланган. Хусусан:
- Олтинкўл туманидаги “ВРБ 2022” МЧЖга қарашли плёнка ишлаб чиқариш цехининг электр ҳисоблаш ускунасига ташқи таъсир кўрсатилгани натижасида давлат манфаатларига 1 миллиард 82 миллион (2 миллион 405 минг 441 кВт/соат);
- Андижон шаҳридаги “Б.Х.” МЧЖга қарашли чойхонанинг электр ҳисоблаш ускунасига ташқи таъсир кўрсатилгани натижасида давлат манфаатларига 326 миллион сўм (724 минг 907 кВт/соат);
- Андижон шаҳридаги “ЗНХ Ф.” хусусий корхонаси электр ҳисоблагични ўзбошимчалик билан алмаштириб юборгани натижасида давлат манфаатларига 140 миллион сўм (311 минг 464 кВт/соат), учта ҳолатда жами 1 млрд 548 млн 815 минг 600 сўм зарар етказилган.
Ушбу миқдордаги электр энергияси 16 минг 840 та хонадоннинг бир ойлик истеъмолига тенгдир.
Қоидабузар истеъмолчиларга нисбатан белгиланган тартибда чоралар кўриш учун тегишли ҳужжатлар ҳуқуқни муҳофаза этувчи органларга тақдим қилинган.
Аввалроқ Жиззах шаҳридаги МЧЖ 3 млрд 840 млн сўм ёки 19 200 та хонадоннинг бир ойлик истеъмолига тенг миқдордаги табиий газдан ноқонуний фойдалангани аниқланганди. Шунингдек, Тошкентда салкам 530 млн сўмлик газдан ноқонуний фойдаланилгани, Ўзбекистонда бир ойда электр ва газдан ноқонуний фойдаланиш оқибатида тизимга қанча зарар етгани тўғрисида хабар берилган эди.
Изоҳ (0)