Академик Назар Тўраев 85 ёшида вафот этди

Фанлар академияси академиги, таниқли физик олим Назар Тўраев 3-октябр куни 85 ёшида вафот этди. Бу ҳақда Ўзбекистон Фанлар академияси хабар берди.

Назар Тўраев 1938 йили Денов туманида туғилган. Физик олим, Ўзбекистон Фанлар академияси академиги (2000), Ўзбекистонда хизмат кўрсатган фан арбоби (1988), физика-математика фанлари доктори (1980), профессор (1982).

Назар Тўраевнинг илмий ишлари атом зарраларнинг қаттиқ жисмлар сиртида сочилиши назарияси, ионларнинг бирламчи ва иккиламчи сочилишига оид. У назарий физика масалаларини компьютерда алгоритмлаб ечишни Ўзбекистонда биринчи бўлиб амалга оширган. Унинг раҳбарлигида лазер нури билан қишлоқ хўжалик экинлари уруғларини нурлантириш илмий лабораториялари ташкил этилган. Ўзбекистон Олий Кенгаши депутати (1990-95). “Меҳнат шуҳрати” ордени билан мукофотланган (1998).

Апрель ойида Ўзбекистон Фанлар академияси академиги Ҳабибулла Акбаров 87 ёшида вафот этганди. Ундан олдин эса Генетика ва ўсимликлар экспериментал биологияси соҳасида дунёга танилган олим академик Абдумавлон Абдуллаев 92 ёшида, академик Турғунпўлат Даминов бўлса 81 ёшида оламдан ўтган эди.