Америкалик миллиардер Илон Маск Х ижтимоий тармоғида Украина президенти Владимир Зеленскийни масхара қилиб, мем жойлади. Мемда Зеленскийнинг сурати устига “Миллиард доллар ёрдам сўрамаганингга 5 дақиқа бўлганида” деб ёзилган.
Украина президенти офиси раҳбари маслаҳатчиси Михаил Подоляк мазкур мемни танқид қилиб, Илон Маскка мурожаат қилди. Подоляк Россияни қўллаб-қувватлаш уруш ва Украина халқининг геноцидига қўйилган тўғридан тўғри сармоя эканини эслатди.
“Бугунги кунда Россияга ҳар қандай ёрдам урушга, геноцидга, эркин дунёни ўлдиришга, эскалация ва жазосиз қолиш ҳуқуқига тўғридан тўғри сармоядир. Украина бўйича ҳар қандай сукунат ёки киноя оммавий зўравонлик ва қирғинни оқлайдиган Россия ташвиқотини сўзсиз рағбатлантиришдир”, — деди Подоляк.
Унинг сўзларига кўра, уруш эпицентридан минг километр узоқликдаги медиа вакилларининг барчаси ҳам ҳар куни содир бўлаётган портлашлар ва ота-оналарини йўқотаётган болалар йиғиси нимани англатишини тушуна олмайди.
“Баъзида сукут сақлаш маъқул, шундай эмасми, Илон Маск?” — деб қўшимча қилди Подоляк.
Бироқ кейинроқ у ўз постини ўчириб ташлади ва Илон Маск ҳақидаги эслатмани олиб ташлаб, янгисини чоп этди.
Изоҳ (0)