Қашқадарёда қишлоққа тушган икки айиқ боласи ушланиб, қўриқхона ҳудудига қўйиб юборилди. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги матбуот хизмати хабар берди.

Маълум қилинишича, Шаҳрисабз тумани, “Шакартери” МФЙ, Сойбўйи қишлоғи ҳудудига тоғли ҳудуддан Ўзбекистон Қизил китобига киритилган икки бош Тян-Шан қўнғир айиғи болалари келиб тушган.

Вазият юзасидан Экология вазирлиги Қашқадарё вилоят бошқармаси, Шаҳрисабз туман ИИБ, Миллий гвардия, Тошкент ҳайвонот боғи ҳамда Ҳисор қўриқхонаси ходимларидан иборат тезкор ишчи гуруҳ тузилди. Воқеа жойига етиб борган ишчи гуруҳ томонидан кўрилган оператив чора-тадбирлар натижасида айиқ болалари махсус ўқ-дорили қурол ёрдамида ухлатилди.

Айиқ болаларига ҳеч қандай шикаст етказилмасдан, Ҳисор давлат қўриқхонасининг “Танхоз” дарё бўлимига қўйиб юборилди.

Бундан бир неча кун аввал Тошкент вилояти Паркент туманида айиқ озуқа излаб, аҳоли яшайдиган ҳудудга келган ва фермер хўжалигига тегишли бўлган 14 бош қўйдан 2 тасини олиб кетганди.