Расман: Муроджон Аҳмадалиевнинг Кевин Гонсалесга қарши жанги санаси ва жанг манзили аниқ бўлди

Профессионал бокснинг биринчи ярим енгил вазн тоифасида собиқ жаҳон чемпиони Муроджон Аҳмадалиев Кевин Гонсалесга қарши рингга кўтарилади.

Бутунжаҳон бокс ассоциацияси (WBA) ўзбекистонлик Муроджон Аҳмадалиев ва мексикалик Кевин Гонсалес ўртасида биринчи ярим енгил вазн тоифасида элиминатор жанги учун буйруқ берди.

Жанг 9-октябрь (Тошкент вақти билан 10-октябрь) куни АҚШнинг Техас штати, Ҳюстон шаҳрида ташкил этиладиган бокс оқшоми доирасида бўлиб ўтади.

Шунингдек, WBA ҳар икки боксчи жангдан тушадиган маблағни 50 % дан олишини маълум қилди. Бу дегани, ҳар икки боксчи ушбу жангдан камида 80 000 доллар ишлаб олади.

Маълумот учун, WBA йўналишида собиқ чемпион Муроджон Аҳмадалиев айни дамда ушбу ташкилот рейтингида биринчи ўринда, Гонсалес эса иккинчи ўринда бормоқда.

Муроджон фаолияти давомида 12 та жанг ўтказиб, 11 тасида ғалаба қозонган. Ўзбекистонлик боксчи апрель ойида филиппинлик Марлон Тапалесга қарши жангда мағлубиятга учраб, WBA ва IBF камарларини бой берганди. 

Кевин Гонсалес эса проф боксда 26 та жанг ўтказиб, 25 тасида ғалаба қозонган. Битта жангда эса дуранг натижа қайд этилган.