Агар бир баррел нефть нархи 40 долларгача туширилса, Россия Украинада “уруш олиб боролмайди”, деди АҚШ собиқ президенти Дональд Трамп Мичигандаги тарафдорлари олдида. Унинг нутқи C-Span телеканали томонидан трансляция қилинди.
Трампнинг таъкидлашича, бир баррел нефть нархи 115 доллар бўлгани сабабли, Россия “бойлик орттирди” ва пул ишлашда давом этмоқда.
“Менга яна тўрт йил вақт беринг ва мен мамлакатимизни ўлдираётган бу даҳшатли глобализмга барҳам бераман. Мен Қўшма Штатлар энг йирик ва энг қудратли саноат давлати бўлиб қайтишини таъминлайман”, — деб қўшимча қилди Трамп.
У президентликка қайтса, Украинадаги урушга тезда барҳам бера олиши ҳақида бир неча бор гапирган.
“Менинг (сайловдаги) ғалабам маълум бўлиши биланоқ, икки кишига қўнғироқ қиламан: Владимир Путин ва Владимир Зеленскийга. Биз 24 соат ичида келишувга эришамиз”, — деган Трамп эҳтимолий келишув тафсилотларини ошкор қилмасдан.
Шу билан бирга, у Киев эскалациянинг олдини олиш учун ҳудудий ён бериши мумкинлигини ҳам инкор этмаган.
Аввалроқ Зеленский NBC телеканалига берган интервьюсида Дональд Трампнинг Оқ уйга қайтган тақдирда, Украинадаги урушни 24 соат ичида тўхтатиш ҳақидаги ваъдаларига ишонмаслигини айтганди. NBC мухбири Трампнинг можарони тезда ҳал қила олиши ҳақидаги саволига Зеленский савол билан жавоб берди: “Нега у шуни аввалроқ қилмаган?”.
Яқинда Путин 2024 йилги сайловларда Дональд Трампнинг ғалаба қозониши АҚШ билан муносабатларни ўзгартирмаслигини айтди.
Изоҳ (0)