Сергели туманидаги фавқулодда ҳолатда буткул яроқсиз ҳолга келган товарлар учун божхона тўловлари ундирилмайди. Бу ҳақда Божхона қўмитаси матбуот хизмати бош инспектори Ҳусан Тангриев маълумот берди.
Унга кўра, Сергели туманидаги фавқулодда ҳолат содир бўлган омборда божхона органлари томонидан қатор чора-тадбирлар давом эттирилмоқда. Хусусан, Божхона қўмитаси томонидан махсус ишчи гуруҳ ташкил қилинган бўлиб, ёнғиндан зарар кўрган божхона назорати остидаги товарлар тўлиқ инвентаризациядан ўтказилмоқда.
Мазкур товарларнинг келгусидаги божхона назорати қай тартибда амалга оширилиши юзасидан тадбиркорларга тўлиқ тушунтириш ишлари олиб борилмоқда.
“Ушбу ҳолат бўйича тадбиркорларимизда саволлар туғилса, 11 08 қисқа рақамли ишонч телефони, шунингдек, Божхона қўмитасининг + 998 55 502 76 00 (ички: 74-11, 74-10, 74-05) телефон рақамларига қўнғироқ қилишлари мумкин.
Эслатиб ўтамиз, Божхона кодексининг 14-моддасига биноан табиат ҳодисалари (зилзилалар, ер кўчишлари, довуллар, қурғоқчиликлар ва ҳоказо) ёки юридик ва жисмоний шахсларнинг хоҳиш-иродаси ҳамда хатти-ҳаракатларига боғлиқ бўлмаган бошқа ҳолатлар сабабли келиб чиққан, шунинг оқибатида мазкур шахслар қабул қилган мажбуриятларини бажара олмайдиган фавқулодда ва олдини олиб бўлмайдиган, кутилмаган ҳолатлар енгиб бўлмас куч таъсири ҳисобланади.
Шунингдек, товарлар вақтинча сақлаш ва божхона омбори божхона режимларида сақланаётган даврда авария ёки енгиб бўлмас куч таъсири оқибатида яроқсиз ҳолга келган, бузилган ёки шикастланган товарлар ваколатли шахс томонидан танланган божхона режимига у шу ҳолатда божхона ҳудудига олиб кирилган товар каби жойлаштирилади.
Яъни, ёнғиндан талафот кўрган товарлар юзасидан ФВВ билан ҳамкорликда далолатномалар тузилади, ушбу далолатномалар асосида товарлар божхона расмийлаштирувидан ўтказилади.
Бунда, агар товар тўлиқ яроқсиз ҳолатга келган бўлса, ушбу товарга нисбатан иқтисодий сиёсат чоралари қўлланмайди”, — дейилади хабарда.
Сергели туманида кучли портлаш
Тошкент шаҳри Сергели туманидаги “Қурувчилар” даҳасида Inter Logistics МЧЖга қарашли омборхонада кучли портлаш ва ёнғин 28-сентябр куни тунда содир бўлганди. Ҳодиса оқибатида жабрланганларнинг умумий сони 163 кишини ташкил этди, бир нафар ўсмир ҳодиса оқибатида вафот этди. Мазкур ҳолат юзасидан ИИВ Тергов департаменти томонидан Жиноят кодексининг 259-моддаси (ёнғин хавфсизлиги қоидаларини бузиш) 2-қисми “а” ва ”б” бандлари билан жиноят иши қўзғатилди.
Содир бўлган фавқулодда ҳодисани ўрганиш, кўрилган талафотларни бартараф этиш ва жабрланганларга ёрдам кўрсатиш бўйича президент топшириғига кўра ҳукумат комиссияси тузилди. Унга кўра, комиссия фавқулодда ҳолат оқибатида зарар етказилган ҳар бир уй-жойни, жумладан, аҳоли хонадонлари, кўп қаватли уй-жойларнинг фасад қисмлари, дераза ва ромлари ҳамда таъмирталаб аҳволга келиб қолган бошқа бино ва иншоотларга етказилган зарарларни бартараф этиш бўйича моддий ёрдам кўрсатиш чораларини кўради.
Изоҳ (0)