Apple сенсорли матони патентлаш учун ариза топширди. Бу нимани англатади?

Apple аллақачон қурилмалардан ташқари бошқа маҳсулотларни ишлаб чиқаришни режалаштирмоқда. Бу ҳақда AppleInsider хабар берди.

Apple бренди тадқиқотчилари компания яқинда топширган янги патент аризасини ўрганди. Унда матони сезиш қурилмаси, оддий сўз билан айтганда, инсоннинг тегинишини сезадиган сенсорли мато ҳақида гап кетган. 

Ҳужжатда компания замонавий технологияларга хос бўлган турли элементлар — тугмалар, калитлар, сичқонлар, трекболлар, жойстиклар, сенсорли панеллар ва бошқалар билан тажриба ўтказиши мумкинлиги ёзилган. Бироқ анъанавий гаджетлар одатда қаттиқ материаллар ёрдамида ишлаб чиқарилади.

Патент деярли ҳар қандай истеъмол маҳсулотига қўшилиши мумкин бўлган сенсорли матони тавсифлайди. Бу кийим, аксессуарлар, безак буюмлари ва ҳатто мебел бўлиши мумкин. Яъни матони дизайнга киритиш мумкин бўлган ҳамма нарса.

Келажакда Apple бу ғояни қандай ишлаб чиқишини прогноз қилиш қийин. Эҳтимол, ақлли соатлар тасмаси сенсорли бўлиб қолади. Ёки MacBook корпусидаги тўқимачилик элементи жорий батарея заряди ҳақидаги маълумотларни кўрсатади.

Бироқ патент аризаси бундай технология яқин келажакда пайдо бўлишига кафолат бермайди. Эҳтимол, компания рақобатчиларни мағлуб этиш мақсадида буни келажак учун қиляпти.