Брюс Уиллиснинг рафиқаси актёрнинг аҳволи оғирлашаётгани ҳақида сўзлаб берди 

Йил бошида Голливуд актёри Брюс Уиллисда кам учрайдиган неврологик касаллик аниқланган эди. Актёр деменциянинг ноёб туридан азият чекмоқда. Брюснинг рафиқаси яқинда берган интервьюсида унинг аҳволини оғир деб атади.

“Инсоннинг ақлдан озиши оғир экан. Бу биринчи навбатда шу дарддан азият чекаётган инсон учун оғир. Шунингдек, бу вазиятда унинг оила аъзоларига ҳам осон эмас”, — дейди Эмма Хамминг Today шоусига берган интервьюсида.

“Айримлар бу оилавий касаллик эканлигини айтишади. Бу ҳақиқатан ҳам тўғри”, — дея қўшимча қилади у.

Актёрнинг рафиқаси унинг аҳволи оғирлашаётганини айтган.

“Бу ҳақда гапириш қийин. Миянинг пешона қисми инсоннинг ўзини англашига хизмат қилади. Биз билмаймиз. Айримлар ўзини англаш ҳиссини биринчи ўринда йўқотади, айримлар эса бу ҳисни узоқроқ вақт сақлаб қолади”, — дейди у.

Шунингдек, Эмма бу ҳақда фарзандларига қандай айтишганини ҳам сўзлаб берган.

“Биз учун болаларга уларнинг оталари қандай касалликка чалинганини айтиш муҳим эди. Уларга бу қандай касаллик эканлигини тушунтирганмиз. Сабаби агар сиз тиббий нуқтаи назардан нима рўй бераётганини тушунсангиз, ҳаммаси равшанлашади”, — дейди у.

Эмма оиласидаги оғир вазиятга қарамай, ўзини қўлга олишга интилаётгани ҳақида ҳам гапириб ўтган.