Хоразм вилояти Урганч шаҳрида ишга киритиб қўйиш учун пора сўраган ҳамшира қўлга олинди, деб хабар беради вилоят суди.
Маълум қилинишича, Жиноят ишлари бўйича Хонқа туман судида Урганч шаҳар тиббиёт бирлашмаси туғуруқ шифохонаси реанимация бўлими ҳамшираси бўлиб ишлаган 40 ёшли Г.А.га нисбатан жиноят иши кўриб чиқилган.
Судда аниқланишича, Г.А. алдаш йўли билан ўзганинг мулкини қўлга киритиш мақсадида 2023 йил апрель ойининг бошларида фуқаро И.О.ни “Ўзбекистон темир йўллари” акциядорлик жамиятининг Урганч шаҳридаги шифохонасида юқори лавозимда ишловчи танишлари орқали ҳамширалик вазифасига ишга жойлаштириб қўйишини ваъда қилган. Бунинг учун юқори лавозимда ишловчи танишига 2,5 минг доллар бериши кераклигини айтиб алдаб, уни пора беришга қизиқтирган.
У 20 апрель куни соат 12:30 ларда Урганч шаҳар тиббиёт бирлашмаси туғуруқ шифохонасида И.О.дан 1,5 минг доллар ва 5,5 миллион сўм пулларни олган вақтида ҳуқуқни муҳофаза қилувчи орган ходимлари томонидан ушланган.
Судланувчи Г.А. судда айбига тўла иқрорлик билдириб, айбига иқрорлик тўғрисидаги келишув ихтиёрий равишда тузилганини, ўз ҳаракати моҳиятини, унинг шартларини тушунганини, қилмишидан пушаймонлигини, енгиллик қилишни сўраб кўрсатув берган.
Суд ҳукмига кўра, Г.А.га Жиноят кодексининг 25, 168-моддаси (фирибгарлик) 1-қисми ва 28, 211-моддаси 1-қисмида (пора бериш) назарда тутилган жиноятларни содир қилганликда айбли деб топилиб, учун узил-кесил икки йил озодликни чеклаш жазоси тайинланган.
2022 йил декабрда Қашқадарё вилоятининг Қарши туманида тиббиёт бирлашма бош шифокори 500 доллар пора билан қўлга тушгани тўғрисида хабар берилганди. Шунингдек, август ойида Андижон вилоятининг Жалақудуқ туманида пора эвазига ҳамшираликка ишга киритиб қўймоқчи бўлган шахс ушланган эди. 2023 йил апрелида эса Қашқадарёда соғлом одамни руҳий касалхонага рўйхатга қўйган бош шифокор қўлга олинганди.
Изоҳ (0)