“Фарҳод ва Ширин”, “Зарб” ва “Ҳамроҳ” фильмлардаги роллари билан томошабинларга яхши таниш бўлган актёр Умид Искандаров 25-сентябр куни 43 ёшни қаршилади. Хўш, омадли ижодкорнинг муваффақият сири нимада? Унинг кинода камнамо бўлиб қолишининг сабаблари нима? Келинг, шу каби саволларга қуйида жавоб излаймиз.
“Участкавойнинг ҳам рўйхатида турганман”
Умид Искандаров ижодкорлар оиласида дунёга келган. Унинг отаси ҳам ўз даврининг машҳур ижодкорларидан бири бўлган ва узоқ йиллар Ўзбекистон телерадиокомпаниясида фаолият юритган.
— Отам Қурбонали Маҳсудхонзода ўз даврининг машҳур радиобошловчиси бўлган. У 40 йил Ўзбекистон телерадиокомпаниясида фаолият юритган. Овози жуда гўзал бўлган, у ахборотларни шу қадар чиройли ўқирдики, томошабинни мафтун этоларди. Оилада уч ўғил бўлганимиз учун уй ишларида онамга ёрдамлашардик. Отам ўқишимизни назорат қиларди, онам эса уй ишларини ўргатарди. Ҳатто кийим дазмоллашнинг ҳам сир-асрорларини ўргатган. Болалигимда ниҳоятда шўх ва ўйинқароқ бола бўлганман. Ҳатто “участкавой”нинг ҳам рўйхатида турганман. Тарбиям ёмон томонга ўзгарганидан кейин отам рус мактаби бунга акс таъсир этяпти деб ўзбек мактабида таҳсил олишимни истаган, — дейди Умид Искандаров.
“Отамнинг бошқа оиласи бўлган”
Актёр болалигида онасига қийин бўлгани, аммо бунинг учун отасидан ранжимаслиги ҳақида ҳам айтиб ўтди.
— Болалигимизда ота-онам ажрашиб кетишган. Улар ўртасида қандай муаммо бўлгани менга қоронғи. Отам онам билан ажрашгач, бошқа оила қурган. У оиласидан иккита қиз фарзанди бор. Онам уч ўғил билан қолган, ўзига яраша қийинчиликлари ҳам бўлган. Аммо отам ҳеч қачон ўғилларига бееътибор бўлмаган. Сингилларимни тан оламан ва уларни яхши кўраман.
Отам асли туркистонлик, онам эса самарқандлик бўлган. Болалигимизда отамнинг қариндошларини кўриш учун Қозоғистонга тез-тез бориб турардик. Шу боис отам биздан айро яшаганини ҳеч қачон ҳис қилмаганман. Ҳаётимда отам ҳам онам ҳам мен учун қадрли, — дейди актёр Умид Искандаров.
“Украинада бош ошпаз бўлганман”
Одатда актёрлар болаликдан санъатга қизиқишади. Аммо Умид Искандаровда бундай қизиқиш бўлмаган. У актёр бўлишни хаёлига ҳам келтирмаган.
— Болаликда кўча ҳаётига қизиқадиган бола бўлганим учун отам ҳунар ўрганишимни ҳам истаган. Мактабни тамомлагач ошпазга шогирд тушиб, соҳа сир-асрорларини ўрганганман. Танишларимнинг маслаҳати билан Украинага ишлашга борганман. Рус тилини билганим учун ишга мослашиб кетишим қийин кечмаган. Олти йил деганда ресторанда бош ошпаз мавқейига ҳам эришганман. Аммо мусофирчиликда яшаш қанчалик қийин эканлигини яхши биламан. Бир куни кинокастинг ҳақида эшитиб қолганман ва шунчаки унда иштирок этиб кўрганман. Энг қизиғи, ролга тасдиқланганман. Аммо қандайдир сабабларга кўра фильмда суратга тушолмай, 25 ёшимда Ўзбекистонга қайтиб келганман, — дейди актёр Умид Искандаров.
“25 ёшимда институтга кирганман”
Умид Искандаров ҳамкасбларига нисбатан анча кеч кино оламига кириб келган. Аммо хушбичим йигитнинг маҳорати режиссёрларга маъқул келиб, уни бош ролларга таклиф қилишади.
— 25 ёшимда Ўзбекистон давлат санъат ва маданият институтининг Телевидение ва радио режиссёрлиги факультетига қабул қилинганман. Учинчи курсдан бошлаб фильмларга таклиф қилишган. 2008 йили “Қасд” номли фильмда суратга тушганман. Аммо у фильм негадир намойиш этилмаган. Ҳатто интернет тармоқларида ҳам йўқ, — дейди актёр.
“Ажрашишимнинг асосий сабаби — фарзандсизлик”
Умид Искандаров 2009 йилдан 2015 йилга қадар сермаҳсул ижод қилади. Унинг нафақат кинолардаги, балки клиплардаги иштироки ҳам томошабинларга манзур бўлади. Ижоди гуллаган вақтда актёр грим устаси Рената Искандарова билан оила қуради. Бир-бирини тушунадиган жуфтликка ҳамма ҳавас қиларди. Афсуски, 2015 йили улар ажрашганини маълум қилишди.
— Турмуш қурганидан кейин эркак ҳам, аёл ҳам ота-она бўлишни истайди. Рената ҳам буни орзу қиларди. Фарзандли бўлсак, ҳамма ишимни ташлаб, у билан овора бўламан, кўп фарзандимиз бўлади, дерди. Бўлмади. Биз жуда кўп ҳаракат қилдик. Бормаган жойимиз қолмади. Охири борган жойимизда ҳамма гапни юзимизга айтишди. Иккаланг ҳам соппа-соғсан, шунчаки бир-бирингга тўғри келмайсизлар. Сиз бошқага уйланиб, аёлингиз бошқага турмушга чиқса, фарзандли бўласизлар, дейишди. ЭКУ қилгим келмади, мен бу нарсани тўғри деб билмадим.
Орада болалар уйидан бола асраб олишни ҳам режалаштирдик. Шу пайтда отам таҳлил натижаларини билдилар ва меҳрибонлик уйидан оладиган боланинг ота-онаси, насл-насабини билмайсан. Келинга кет демаймиз, рози бўлса, сени яна битта хотинга уйлантириб қўйсин, дедилар. Лекин қайси аёл эрига иккинчи хотин олиб беришга рози бўлади, — дейди актёр.
“Собиқ аёлимни соғинаман”
Шунингдек, актёр қандай ҳолларда ўзини ёлғиз ҳис қилиши ҳамда собиқ рафиқасини гоҳида соғиниши ҳақида ҳам гапириб ўтди.
— Ишларингизни битириб, уйга келасиз. Диванга ўзингизни ташлайсиз. Кимдир сиздан қорнингиз очдими, деб сўрашини хоҳлайсиз. Ёки шунчаки ўтириб куним қандай ўтгани ҳақида мен билан дилдан суҳбат қурадиган одамни қўмсайман. Шу нарсани қадри ўтади. Агар буни бошимдан ўтказмаганимда, бунақа бўлмасмиди? Айниқса, аёл жуда яхши пазанда бўлган бўлса. Менинг аёлим ошхона қироличаси бўлган. Бир-бир соғинаман, — дейди Умид Искандаров.
“Мақсадсиз инсонга айланиб қолдим”
Шахсий ҳаётидаги муаммолар актёрнинг фаолиятига ҳам акс таъсир этади. Ҳатто унинг зарарли одатларга берилгани ва руҳий тушкунликка тушгани ҳақида ҳам маълумотлар тарқалганди.
— Эркак кишининг ҳаётида шундай пайтлар ҳам бўлар экан. Маълум вақт зарарли одатларга берилдим. Гап-сўзларга эътибор бермайман, деганингизда ҳам, кўнгилга оғир ботар экан. Рената иккимизнинг таҳлилларимиз ижобий чиққан. Шунчаки, бир-биримизга тўғри келмаймиз. Аммо одамлар буни нотўғри талқин қилишди. Шу боис бир муддат зарарли одатларга берилиб, мақсадсиз инсонга айланиб қолгандим. Ҳозир ҳаммаси жойида, умидимни узмаганман. Ҳаммаси изига тушиб кетишига кўзим етади, — дейди актёр Умид Искандаров.
“Заррача афсусланганим йўқ”
Актёр нега киноларда камнамо бўлиб қолгани ва гонорари ҳақидаги саволларга қуйидагича жавоб берган.
— 40 ёшдан ошган актёр ва актрисалар ижодда камнамо бўлиб қолишади. Боиси бу ёшда ошиқ ролига ҳам, ота-она ролига ҳам мос келмайди. Чунки ўзбек киносида бош қаҳрамон ролини ижро этиш учун ёш ва чиройли бўлиш керак. Хуллас, ана шундай сабабларга кўра кўп фильмларда суратга тушмаяпман. Кейин аввалгидек кўп фильмлар ҳам суратга олинаётгани йўқ. “101-рейс” фильми уч йил давомида суратга олинди. Аммо бу фильмда суратга тушганимдан заррача афсусланганим йўқ. Кетган вақтга яраша яхши фильм олинди, — дейди актёр Умид Искандаров.
“Қизиқишим ортиб боряпти”
Ҳар бир инсоннинг севимли машғулоти бўлганидек, Умид Искандаровнинг ҳам ҳоббилари бор. У машиналарга қизиқади.
— Болалигимдан машиналарга, уларнинг тузилишига, янги чиққан моделларига жуда қизиқаман. Орада ташвишлар билан бўлиб бу ҳоббимни бир оз унутган эдим. Аммо энди ўша қизиқишим яна ортиб боряпти. Бўш вақтим бўлиши билан машиналар ҳақидаги кўрсатувларни мазза қилиб томоша қиляпман, — дейди Умид Искандаров.
Изоҳ (0)