Россияпараст қарашлари билан танилган собиқ бош вазир Роберт Фиконинг партияси Словакияда бўлиб ўтадиган сайловларда ғалаба қозонса, Россия тез орада Европадаги янги иттифоқдошига эга бўлади. Бу ҳақда Bloomberg хабар берди.
Словакиянинг энг узоқ вақт хизмат қилган бош вазири Фико 2018 йилда истеъфога чиқишга мажбур бўлганди. У ҳозирда сайловолди кампаниясида уруш оқибатлари ҳақидаги хавотирлардан фаол фойдаланмоқда.
“Фико Украинага ҳарбий ёрдамни тўхтатишга ваъда берган, Словакия президентини Америка агенти деб атаган ва Украинанинг НАТОга аъзо бўлишига қарши. Ҳозирча Словакия одатда Киевни қўллаб-қувватлашда собит бўлиб келган, бироқ сўнгги сўровлар шуни кўрсатадики, словакларнинг ярмидан кўпи урушда Ғарб ёки Украинани айблайди”, — дейилади хабарда.
Словакияда сайловлар
Аввалроқ ОАВ, агар собиқ ҳукумат раҳбари Роберт Фико янги бош вазир бўлса, Словакия Украинага ҳарбий ва сиёсий кўмакни бекор қилишини таъкидлаганди. У 30 сентябрь куни Словакияда бўлиб ўтиши кутилаётган навбатдан ташқари парламент сайловларидан кейин бу лавозимга асосий даъвогар сифатида кўрилмоқда.
Шу билан бирга, Европа ва Словакия регуляторлари орасида сайловлар арафасида маҳаллий ижтимоий тармоқларда дезинформация ва кремлпараст мафкура фаол тарқалаётганидан хавотир кучаймоқда. Европа Иттифоқи энг йирик ижтимоий тармоқларни чет эл ташвиқотига қарши курашмаса, катта миқдордаги жарималар ҳақида огоҳлантирган.
Изоҳ (0)