Қозоғистонда савдо субъектларининг барчаси тарозилар тўғрилиги бўйича йиллик мажбурий текширувдан ўтказилади, деб хабар бермоқда Informburo. Қозоғистон Савдо ва интеграция вазирлигининг хабар беришича, диагностика бутун мамлакат бўйлаб мавжуд бўлган аккредитацияланган текширув лабораторияларида сертификатланган мутахассислар томонидан амалга оширилади.

Аввал Қозоғистонда текшириш талаби фақат сотилган товарларнинг геометрик параметрларини, масалан, узунликни ўлчайдиган қурилмаларга нисбатан қўлланган. Бироқ бу талаб энди тижорий тарозиларига ҳам тегишли бўлади.

“Ушбу текшириш ўлчов воситаларининг мажбурий метрологик талабларга мувофиқлигини тасдиқлаш учун мўлжалланган. Шу мақсадда турли тадбирларни ўз ичига олган сертификатланган текшириш методологияси қўлланади. Муваффақиятли текшириш натижалари расмий текшириш сертификати билан, муваффақиятсиз бўлганлар эса ўлчов воситасининг яроқсизлиги тўғрисидаги билдиришнома билан тасдиқланади”, — дейилади Қозоғистон Савдо вазирлиги хабарида.

Вазирлик таъкидлашича, ушбу процедура харажатлари 5 минг тенгедан (10,5 доллар) ошмайди. Тадбиркорлар талабни бажармаса, Маъмурий жавобгарлик тўғрисидаги кодексда назарда тутилган жаримага тортилиши ҳақида огоҳлантирилмоқда. Жисмоний шахсларга (218 доллар) ҳам, юридик шахсларга ҳам (1600 доллардан 4350 долларгача) жарималар қўлланади.

“Ҳар куни бутун мамлакат бўйлаб истеъмолчилар харид қилишда ҳар хил турдаги ва шароитлардаги тарозиларга таянади, кўпинча тасдиқланмаган ўлчов натижалари учун пул тўлайди. Натижада фуқароларнинг шикоятлари келиб чиқади. Бўлажак текширув тарозиларнинг тўғрилигини таъминлайди, истеъмолчиларни ҳимоя қилади ва фирибгарлик ҳолатларини камайтиради”, — деди Техник жиҳатдан тартибга солиш ва метрология қўмитаси раиси Куаниш Эликбоев.

Қозоғистон Савдо ва интеграция вазирлиги бу янгилик қишлоқ хўжалиги ярмаркаларига тааллуқли эмаслигини таъкидлади.