Қирғизистонда буғдой уни ва озиқ-овқат буғдойи донининг экспортига олти ой муддатга тақиқ жорий этилмоқда. Масъулларнинг таъкидлашича, мазкур қарор озиқ-овқат хавфсизлигини таъминлаш ва озиқ-овқат маҳсулотларининг бозор нархларини барқарорлаштириш мақсадида қабул қилиган. Ҳужжат 25-сентябрдан кучга кирган.

Қўшни Қирғизистоннинг ушбу қарори Ўзбекистон ун бозорига қанчалик таъсир қилади? Мазкур савол юзасидан Ўзбекистон Қишлоқ хўжалиги вазирлиги ахборот хизмати раҳбари Дилшод Назиров “Дарё”га изоҳ берди.

Айтилишича, Қирғизистон Ўзбекистоннинг буғдоқ ва дон масалаларидаги асосий импортёри эмас.

“Аслида кўп мамлакатлар бу каби усулни қўллаш орқали, ўз мамлакатларидаги озиқ-овқат хавфсизлигини таъминлашга ва янги ҳосил етишгунига қадар баланс сақлашга ҳаракат қилишади. Қирғизистоннинг буғдой ва дон маҳсулотлари Ўзбекистон бозоридаги экспорт улуши деярли салмоғи кам бўлгани учун, бозор ва ундаги нарх-наво тебранмасига салбий таъсир ўтказмайди, деб ҳисоблаш мумкин”, – дейилади вазирлик изоҳида.

Қўшимча қилинишича, ўтган 8 ой давомида Қирғизистондан жами 1,5 минг тонна буғдой Ўзбекистонга импорт қилинган.

Аввалроқ Қирғизистон қишлоқ хўжалиги вазирлиги ун нархи ошиши ҳақида гапирганди. Маҳсулот ижтимоий аҳамиятга эга ва бозорда унинг танқислиги юзага келса, бу мамлакатда озиқ-овқат инқирозига олиб келиши мумкин.