Жиззах вилояти Зомин туманида юк машинаси ЙПХ масканига тиқилиб қолгани акс этган видео тарқалди. Йўл ҳаракати хавфсизлиги хизмати ҳолат бўйича маълумот берди.
Унга кўра, Зомин туманидан ўтувчи халқаро аҳамиятдаги А-376 автомобиль йўлида жойлашган “Яккабоғ-15” мунтазам ЙПХ масканидан катта ҳажмдаги юк ортилган транспорт воситаси ҳаракатланиб ўтаётган вақтда мазкур жараён атрофдаги фуқаролар томонидан тасвирга олинган. Ушбу видео тармоқларда гўёки юкнинг тепа қисми ЙПХ масканидаги устунга тегиб қолгани ҳақидаги изоҳлар билан тарқатилган.
Қайд этилишича, мазкур хабарлар асоссиз бўлиб, катта ҳажмдаги юк ортилган транспорт воситаси ушбу ЙПХ масканидан ҳаракат хавфсизлиги таъминланган ҳолда, масъул ходимларнинг назорати остида эҳтиёткорлик билан олиб ўтилган. Ўтиш жараёнида атрофдаги бирор жиҳоз ёки ортилган юкка зиён етмаган.