Фарғонада мактаб ўқувчиси эҳтиётсизлик сабаб беш ёшли болакайни пневматик қурол билан отиб қўйди. Бу ҳақда “Бу кун” информацион дастури хабар берди.
Маълум қилинишича, мазкур ҳолат Фарғона вилояти Қўштепа туманидаги “Карнайчи” маҳалласида юз берган. Аниқланишича, Абдуллоҳ исмли 5 ёшли бола воқеа содир бўлган куни дадасини овқатланишга чақириш учун унинг олдига боради. Дадаси уйининг ёнидаги чорва моллари парвариш қилиш хўжалигида ишлаган.
Абдуллоҳнинг онасининг сўзларига кўра, гумонланувчи мактабнинг 7 ёки 8-синф ўқувчиси бўлган.
“Пневматик қуролнинг ўқи чап ўпкадан ўтиб, юракнинг чап қоринчасига кириб қолган. Юракни тўлиқ тўхтатган ҳолда, ўқни олиб ташладик. Ҳозирда боланинг аҳволи яхши”, — дейди шифокор.
Қайд этилишича, операция жараёни беш соат давом этган. Ҳозирда мазкур ҳолат Қўштепа тумани ИИБ томонидан тегишли тартибда ўрганилиб, терговга қадар текширув ишлари давом этмоқда.
Изоҳ (0)