Ўзбекистонда Айдар-Арнасой кўллар тизимига қуйиладиган сув ҳажми йилдан йилга камайиб, сув захираси 49,2 миллиард кубометрдан 36 миллиард кубометрга пасайди. Бу Бош прокуратура ва Экология, атроф-муҳитни муҳофаза қилиш ва иқлим ўзгариши вазирлиги ходимлари ҳамкорлигида ўтказилган ўрганиш натижаларида аниқланди.
Маълум қилишича, 11—15-сентябр кунлари дарёлар ўзанларини тозалаш ва қирғоқларини мустаҳкамлаш, норуда фойдали қазилмаларни қазиб олиш ишларининг ноқонуний амалга оширилишига йўл қўймаслик, атроф-муҳитга салбий таъсирининг олдини олиш, шунингдек, транспорт ва гидротехника инфратузилма объектларининг хавфсиз ишлашини таъминлаш мақсадида Жиззах вилоятининг Фориш, Зомин, Шароф Рашидов, Янгиобод туманларида ерости сувларига қудуқ бурғилаш ва улардан фойдаланиш бўйича мораторий жорий қилингани, ерости сувлари сатҳи пасайиб кетаётгани ҳамда Сангзар дарёсида ўзанларни тозалаш ва қирғоқларини мустаҳкамлаш ишлари аҳволи ўрганилди.
Ўрганишлар давомида Айдар-Арнасой кўллар тизимида сувнинг шўрланиш даражаси 10-11 фоизга ошиши натижасида табиий парланиш ва чўллашишнинг кескин ошгани, Рамсар конвенция сига киритилган “Тузкон” бўлимидаги 63,3 минг гектар майдондаги “Арнасой” орнитологик қўриқхонасининг флора ва фаунасига салбий таъсир қилаётгани ҳам аниқланди.
Ўрганишлар натижаси бўйича 27 та ноқонуний қурилмаларни бузиш бўйича суд қарорларининг ижроси таъминланиб, экология бошқармасининг 114,5 миллион сўмлик дебитор қарздорлиги ундирилди.
Ерости сувларидан фойдаланиш учун қудуқ бурғилаш ва улардан фойдаланиш қоидаларини бузган 9 нафар шахсга нисбатан маъмурий ҳуқуқбузарликка доир иш қўзғатилди ҳамда Айдар-Арнасой кўллар тизимида ноқонуний ов қилган ҳуқуқбузарлардан 135,4 миллион сўм жарима ундирилиб, 25,7 миллион сўмлик даъво аризаси киритилди.
Изоҳ (0)